Әбділдә Тәжібаев атындағы облыстық кітапханада «Базар жыраудың әдеби мұрасы» атты кітаптың тұсаукесері өтті. Еңбектің авторы Қазақстан Жазушылар одағының мүшесі, филология ғылымдарының докторы, профессор Бағдат Кәрібозұлы мен филология ғылымдарының кандидаты, доцент Гүлзира Оралова.
«Базар жыраудың әдеби мұрасы» атты жаңа кітап – жырау шығармашылығы туралы екінші монография. Тұсаукесерде Бағдат Кәрібозұлы кітапта жыраудың толғаулары мен дастандарының әдебиет тарихындағы өзіндік орнын, ерекшеліктерін бүгінгі әдебиеттанудың талап-талғамына сәйкес зерделенгенін айтты.
– Базар жырау шығармалары Сыр өңірінен шыққан ақын-жыраулардың ішінен алғашқылардың бірі болып Сәкен Сейфуллин, Мағжан Жұмабаев, Мұхтар Әуезов, Әлкей Марғұлан, Әуелбек Қоңыратбаевтың назарын аударған. Сәкен Сейфуллин «Бұқар жыраудан кейінгі қазақтың ірі жырауы – Базар жырау» десе, Мағжан Жұмабаев: «Асса елдің қамын ойлаған, қалса өзінің ойына терең бойлаған» деп, Базар жыраудың ақындық қабілетін жоғары бағалаған, – деді Бағдат Кәрібозұлы.
Тұсаукесер рәсіміне қатысқан белгілі ғалым, профессор Қазыбай Құдайбергенов: «Заман өзгерген сайын уақыт ағымына ілесіп, халық санасы да жаңғырып отырмақ. Осындай кезде тарихымыздағы таңдаулы тұлғалардың жас ұрпақ жадынан ұмытылып кетпеуіне күш салу – ғылым мен мәдениеттің міндеті ғана емес, аға ұрпақтың адамгершілік парызы», − деп жылы лебізін білдірді.
Шараға Қорқыт ата атындағы Қызылорда университетінің профессоры, техника ғылымдарының докторы Серікбай Қошқаров, филология ғылымдарының кандидаты, профессоры Ғабит Тұяқбаев қатысты. Шара қонақтары Сыр сүлейлерінің көшін бастаған жыраудың шығармалары туралы ойларын білдірді.
Жылдам ақпарат алу үшін Facebook, Instagram желілері мен Telegram каналымызға жазылыңыз!