АҚШ президенті Дональд Трамп Таяу Шығыстағы қақтығыс аясында мұнай бағасының күрт өсуі уақыт өте түзелетінін және бұл жаһандық қауіпсіздік үшін өтелетін шағын ғана төлем екенін мәлімдеді. Бұл туралы ол Truth Social әлеуметтік желісінде жазба қалдырды, – деп хабарлайды KAZINFORM
– Иранның ядролық қаупі жойылғаннан кейін тез арада басылатын мұнай бағасының қысқа мерзімді өсуі — АҚШ пен бүкіл әлем үшін қауіпсіздік пен бейбітшілікке бағытталған өте аз мөлшердегі төлем, — деп жазды Дональд Трамп.
Демалыстан кейінгі сауда-саттықтың ашылуында Таяу Шығыстағы ірі энергетикалық өндірушілердің өндірісті қысқартуынан кейін мұнай бағасы барреліне 100 доллардан асты.
Brent маркалы мұнайдың бағасы 18%-ға өсіп, барреліне 108,68 долларға жетті. Ал америкалық WTI маркалы мұнай шамамен 20%-ға қымбаттап, барреліне 108 долларға дейін көтерілді.
Бұл 2022 жылдың ақпан айынан бергі ең күрт өсім. Сол кезде, яғни Ресей Украинаға басқыншылық жасағаннан кейін де мұнай бағасы барреліне 100 доллардан айтарлықтай жоғары көтерілген еді.
Бұл жағдай АҚШ пен Израильдің Иранмен соғысына байланысты мұнай мен газ жеткізудің әлемдегі ең маңызды бағыттарының бірі саналатын Ормуз бұғазының іс жүзінде жабық қалуына байланысты болып отыр.
Жылдам ақпарат алу үшін Facebook, Instagram желілері мен Telegram каналымызға жазылыңыз!