АҚШ президенті Дональд Трамп Truth Social әлеуметтік желісіндегі парақшасында өзін Венесуэла президентінің міндетін атқарушы ретінде көрсететін суретті жариялады, деп хабарлайды Egemen.kz.
Truth Social желісінде жарияланған суретте Трамптың 2026 жылғы қаңтардан бастап Венесуэланың президенті міндетін атқарып отырғаны көрсетілген. Құжатта оның бұл қызметке 2026 жылдың қаңтарында тағайындалғаны жазылған. Сонымен қатар оның АҚШ-тың президенті лауазымы да сақталатыны көрсетілген.
Еске салайық, 2025 жылғы желтоқсанда АҚШ Венесуэлаға қарсы операция жүргізіп, республика астанасы Каракаста президент Николас Мадуро мен оның жұбайын қолға түсірген болатын. Кейін Мадуроның Нью-Йорктегі Бруклин тергеу изоляторына жеткізілгені белгілі болды.
Дональд Трамп «АҚШ-тың барлық жауларына» Венесуэладағыдай операция жүргізілуі мүмкін екенін ескертті.
Осы күні Нью-Йоркте Венесуэла президентіне қатысты сот ісі бойынша алғашқы тыңдау аяқталды. Мадуроға «есірткі терроризміне байланысты сөз байласу, кокаин контрабандасы, пулеметтер мен жарылғыш құрылғыларды сақтау және оларды АҚШ-қа қарсы қолдануды жоспарлау» айыптары тағылып, төрт рет өмір бойына бас бостандығынан айыру жазасы қаупі төнді.
Сотта Мадуро өзін «әлі де Венесуэланың президентімін» және «тағылған айыптар бойынша кінәлі емеспін» деп мәлімдеді. Оның жұбайы да өз кінәсіздігін алға тартты.
Сот саясаткерді келесі сот отырысына 17 наурызда келуге міндеттеп, консулдық қызметкерлердің қабылдауына рұқсат берді. Қорғау тарапы Венесуэла президентін кепілмен босатуға қол жеткізуге ниетті екенін айтты.
Кейінірек Делси Родригес Венесуэланың уақытша президенті болып тағайындалды. Алғашында ол АҚШ-тың әрекеттерін қатаң айыптап, Мадуроны босатуды талап еткен. Алайда кейін Трампқа жолдаған үндеуін жариялап, венесуэлалықтардың «соғысқа емес, бейбіт өмірге лайық екенін» айтты. Сондай-ақ АҚШ үкіметін «ынтымақтастық бағдарламасы аясында бірлесіп жұмыс істеуге» шақырды.
Бұл мәлімдеме Трамп Венесуэла АҚШ-пен ынтымақтаспаса, жаңа соққы беруге бұйрық беруі мүмкін екенін ескерткеннен кейін жасалды. Сонымен қатар АҚШ президенті Родригеске де қоқан-лоқы жасап, «егер ол дұрыс шешім қабылдамаса, жазасы Мадуродан да ауыр болуы мүмкін» екенін айтты.
Жылдам ақпарат алу үшін Facebook, Instagram желілері мен Telegram каналымызға жазылыңыз!