Сонымен қатар 9-11 сынып оқушыларымен «Мен таңдаған мамандық» тақырыбындағы дөңгелек үстелге қатысып, оқушылардың қойған сұрақтарына жауап берді. Бітіруші түлектерге алдағы сынақтан мүдірмей өтіп, қалаған мамандықтарының иесі болуға тілек білдірді.
– Ауыл мерейін асырған талапты түлектер, сіздерге және білікті ұстаздарға алғысым ерекше. Жылдағы ҰБТ көрсеткіші бойынша мектептің жоғары нәтижесін естіп, көріп келеміз. Осы үрдіс бәсеңдеп қалмай, алдағы ҰБТ нәтижесі бойынша жоғары көрсеткіш көрсетіп, ауылымыздың мақтанышы болады деп сенемін. Үлкен сынақта сәттілік серік болсын, – деді ауыл әкімі Еркін Әбдірайханұлы.
Аталған шарада білім-ғылымға бет бұрып, республикалық және облыстық, қалалық олимпиадаларда дара шауып, жүлдегер атанған дарынды оқушылар әкіммен пікір алмасып, көкейтесті сұрақтарын қойды. Олар қол жеткізген жетістіктері мен алдағы жоспар туралы сөз қозғады. Жеткіншектер алдағы білім олимпиадаларына қатысып, топ жарғандар қатарын толықтыруға уәде берді. Әкім егемен елдің тізгінін ұстайтын өскелең ұрпақтың оқудағы нәтижелеріне тәнті болды.
– Биыл мектепті 11 оқушы бітіріп, үлкен өмірге аяқ басқалы тұр. Оның ішінде 2 үздік оқушымыз бар. Екеуі де қалалық, облыстық олипиадалардың жеңімпазы. Бітірушілер ішінде физика-математиканы да, шығармашалықты да таңдаған оқушыларымыз бар. Олар дәрігер, ІТ, құрылысшы, мұғалім, дизайнер, аспаз, шаштараз секілді сұранысқа ие мамандықтарды таңдауда. Балалар қандай мамандық таңдаса да, жақсы нәтиже көрсетеріне біз сенеміз. Бәрінен үміт күтуге болады, – деді биология пәнінің мұғалімі, 11 сынып жетекшісі Гүлмира Ахметова.
Бүгінде бұл мектепте 547 оқушы білім алуда. Оның ішінде 359 оқушы түрлі үйірмемен қамтылған. Бұл жалпы оқушының 65 процентін құрайды. Қазіргі таңда білім ордасында спорт, қолөнер, өнер салалары бойынша 17 үйірме жұмыс істеп тұр.
– Біздер өздеріңе сапалы білім, саналы тәрбие беру үшін барлық жағдайды жасап келеміз. Ауылда, оның ішінде осы білім ошағында жыл сайын бала саны артып, соған сай білім сапасы да артуда. Сіздер үшін мемлекет қолдан келгеннің бәрін жасайды. Білімді, өнерлі адам қашан да өз жолын адаспай табады. Болашақ сіздердің қолдарыңызда. Сондықтан білім алуда аянып қалмаңыздар, – деді ауыл әкімі Еркін Ахетов.
Оқушылар ауыл әкіміне өздерінің ұсыныс-тілектерін білдіріп, естелік суретке түсті. Кездесу соңында ауыл әкімі мектеп ауласында орналасқан «Ауыл әкімі» аллеясына оқушылармен бірге тал көшеттерін екті.
Ақтілек БЕРДІБАЙҰЛЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!