Алматы облысы әкімінің бірінші орынбасары Қанат Есболатовтың мүмкіндігі шектеулі жандар туралы айтқан сөзі жұрттың ашуын келтірді, – деп хабарлайды Tengrinews.kz тілшісі.
Оқиғаның мән-жайыТалғар ауданында тұрғындармен өткен кездесуде денсаулық сақтау министрі Ақмарал Әлназаровамен бірге отырған Қанат Есболатов кенет:
«Мүгедектердің еңсесін түсірмейік. Онсыз да Алла тағала бұл кісілерді, орысша айтқанда, «их наказали». Сыйлайық», – деген еді.
Осы сөзінен кейін көпшілік әлеуметтік желілерде наразылық білдірді:
«Қалай сонда? Алла жазалады дегені ме? Мұндай сөгісі үшін оны жауапқа тарту керек!»
«Құрметті әкім орынбасары, сіздің сөзіңіз қорлаумен тең. Сізге ешкім этика мен субординацияны үйретпеген бе?»
«Бұл қорлық қой».
Есболатов өз сөзін қалай түсіндірді?Сын күшейгеннен кейін Қанат Есболатов Instagram-да жазба жариялады.
«Денсаулық сақтау министрімен Талғарда өткен кездесуге қалың жұрт жиналды. Әрқайсысы өзекті мәселе көтеріп, сұрақ қоюға асықты. Сондықтан кезек те үлкен болды. Регламент бойынша кездесуге екі сағат бөлінген еді. Бірақ сұрақтардың көп болуына байланысты жиын шамамен 4 сағатқа созылды. Келген азаматтардың арасында бірқатар мүмкіндігі шектеулі жан болды. Кейбірі тік тұрып, өз кезегін күтті. Кезегі жеткенде залдағы бірнеше адам сөзін бөліп, оған кедергі жасай бастады. Регламентті сақтауға шақырдым», – деді ол.
Есболатов орыс тілінде сөйлегенде қателескенін айтып, былай деді:
«Орыс тілінде айтқан сөзімде қателік бар. Ойымды дұрыс жеткізбеппін. «Құдай үлкен сынақ берген» деп айтпақ болғанмын».
Шенеунік халықтан кешірім сұрады:
«Айтқан сөзім көпшіліктің көңіліне, тіпті намысына тигенін де түсіндім. Осы үшін шын ниетіммен кешірім сұраймын».
Жылдам ақпарат алу үшін Facebook, Instagram желілері мен Telegram каналымызға жазылыңыз!