Қызылорда қаласында коммуналдық сала қызметкерлері қыс бойы қол қусырып отырған жоқ. Мұз ойып, жолды қардан тазалады. Күзден бері арықты тазартып, су жүретін жолдардың қоқыстан шығарды. Облыс орталығы – қайнаған тірліктің отаны. Сондықтан сала басшысы Мақсат Өмірбекұлынан көктемгі тіршілік жайын сұраған едік.
– Мақсат Өмірбекұлы, көрген көзге белгілі, сала мамандарының тынымсыз еңбегі қай кезде де байқалып тұрады. Қыс бойы тынымсыз еңбек еткенін көзіміз көрді. Тіпті түнде қар жауса, таңертең қала толық тазаланғанын көріп, тәнті болғанымыз бар…
– Иә, тазалықшылар қыс бойы тәулігіне 24 сағат тер төкті. Қар мен жауынға, боран мен дауылға қарамай қала тұрғындарына жайлы жағдай жасау мақсатында жұмыс істеді. «Қызылорда тазалығы» және «Жасыл Қызылорда» серіктестіктері «мынау сенің жұмысың, мынау менің жұмысым» демей, жұмыла жүк көтерді. Әрине, көпшілік «Жасыл Қызылорданы» тек ағаш егеді, оны суарады, көркейту-көгалдандырумен ғана айналысады деп ойлауы мүмкін. Бірақ ондағы мамандар қыс бойы «Қызылорда тазалығы» мекемесінің жұмысшыларымен қатар жүріп, еңбек етті. Тұтас қаланы қардан тазарту, мұзды ою жұмыстарына қаншама қол күші керек екенін өзіңіз де көріп, біліп жүрсіз.
– Көктемгі жұмыстар қай деңгейде? Сыр берген жаяу жүргіншілер жолдары да көзге түсіп тұр…
– Жер-Ананың бауыры жібіп, тіршілік атаулыға жан біткен кезде қоқыстарын тазалап, ғимараттарын сырлап жатқан көп кәсіпкерді байқауға болады. Қазір көзқарас өзгерген. Тазалыққа, көрнекілікке, әдемілікке деген құмарлық бар. Кәсіпкерлер өздерінің нысандарының алдына гүл егіп, оны әрлеп, көргенде көз тоятын әрекеттер жасауда. Тарбақталып кеткен талдарын балақтауды да ұмытпайды. «Туған қалам – өз үйім» деп, шаһарымыздың әрін келтіріп, сәнін кіргізуде «саусақ бірікпей, ине ілікпейтінін» естен шығармауымыз керек. Жаяу жүргіншілер жолына қатысты да дұрыс айтып отырсыз. Өткен жылы салынған кей жолдардың сыр берген тұсын мердігер мекеме өздері қалпына келтіру, көше жиектерін бекіту тәрізді жұмысты қолға алған. Әрине, бұл ретте кәсіпкердің ойында бизнестің әлеуметтік жауапкершілігі қағидасы мен салған нысанының халыққа сапалы қызмет көрсетуі бірінші орында тұрғанын көрсетеді.
– Бұрын «Жасыл Қызылорда» мекемесі құрылмай тұрып, аяқсу кешеуілдеп жетіп, көп ағаш су жетпегеннен қурап жататын. Қазір өзгеріс бар ма?
– Әрине, қазір «Жасыл Қызылорда» мекемесі айналадағы жасыл-желекке су сеуіп бастады. Аяқсу сәуір айының 15-інен бастап берілу керек деген заңдылығы бар еді. Содан көктемнен бастап насостарды құрып бастайтын. Сәуірге үлгермесе, мамырға дейін барған кездер болды. Әрине, бұл ретте мемлекеттік тапсырысқа қатысқан жеке кәсіпкерлердің қателігі болды. Ал қазір арнаулы мекеме құрылғалы бері бұл жұмыс жолға қойылды. «Жасыл Қызылорда» мекемесі көктем басталғалы әрі кетсе бір аптаның ішінде қала ішіндегі барлық насостарды құрып, орнатып болды. Аяқсуды қазір бер десе, беруге дайын тұр. Гүл егетін орындарды да дайындап жатыр. Ертең осы мекеме өздері егеді, суарады, қарайды. Бастан-аяқ жауапты. Осы күнге дейін өңірде 2 мыңнан астам тал егілді. Оның барлығына күтім жасалып, қаралады. Қазір орталық даңғылға гүл егілді, енді сол жағалаудағы Әбілқайыр хан көшесіне гүл егеміз.
– Істеген жұмыстың нәтижесі болғанда қандай сезімде боласыз?
– Әрине, бөлім басшысы ретінде жалғыз мен істедім деген сөз емес. Бұған дейін де жолға қойылған жұмыс, бұдан кейін де дамымаса, тұраламайды. Өйткені коммуналдық сала қызметкерлерінің қалың қолының арқасында біз осындай жетістікке жетіп отырмыз. Бұрын «ұшатын қалталар қаласы» деген анықтама намысымызға тиетін. Осы стереотипті қалай бұзамыз деп ойланатынбыз. Қазір Қызылорда қаласы – республика бойынша тазалық жөнінен алдыңғы қатарда. Келген меймандардың таңдай қағып кеткенін талай көрдім.
– Мақсат Өмірбекұлы, бұрын да осы саланың маңайында едіңіз. Қазір бел ортасында жүрсіз. Бұрын мен осы жерге барсам, мынадай жұмысты қолға алар едім деген ойыңыз болды ма? Оған кірісіп жатсыз ба?
– Бұрын «Қызылорда автобус паркінде» жұмыс істегенде басқа қалаға барсақ, автобустарына қарап жүреміз. Мұнан соң «Жасыл Қызылорданы» басқардым, бұл уақытта қайда барсам да егілген ағаштарына, жасыл-желегіне қараймын. «Қызылорда тазалығында» болғанда, әрине, өзгелердің тазалығына ден қоямыз. Салыстырып, кемшін тұсына өзгелерден тәжірибе жинап, соны қолданып, жан-жақты дамытып жүресің. Кейде осының барлығын жинап алып, бәріне атсалысып, басын қосып жұмыс істесем ғой деп ойлайтынмын. Сол ойым орындалды. Ойдағы мақсат пен мұрат бар, соған сай жұмыс істеп жатырмыз. Алда атқарар жұмыс көп, жоспар да аз емес.
– Уақыт тауып, сұхбаттасқаныңызға алғыс білдіреміз.
Әңгімелескен Дәулет ҚЫРДАН,
Суретке түсірген
Жылдам ақпарат алу үшін Facebook, Instagram желілері мен Telegram каналымызға жазылыңыз!