И.С.Дурлештер – «КСРО-ның ағарту ісінің үздігі», «Қазақ ССР-ның ағарту ісінің үздігі», 1975-1993 жылдар аралығында №5 мектеп-лицейінде жұмыс істеген, «Жалпы және аналитикалық химия» кабинетін жабдықтаған ұстаз.
Дурлештер Исаак Савельевич 1921 жылы Молдавияда дүниеге келген. Ол дәрігер болуды армандаған. Бірақ сұрапыл соғыс басталып кетіп, оның бұл арманы орындалмайды. Ол Сібірдегі танкі мен қару-жарақ шығаратын фронтқа жіберілген. Кейін ол эвакуациялау жұмыстары жүргізілу барысында Қазақстанның оңтүстігіне тап болған. Қаладағы Н.В.Гоголь атындағы педагогикалық институтта білім алған. Институтты тәмамдап, химия пәнінің мұғалімі атанады. Алғашқыда институтта, кейін И.В.Панфилов атындағы №5 мектепте химия пәнінің мұғалімі болып қызмет атқарған. Сыр өңірінде отбасын құрып, екі ұл тәрбиелеп өсірген. Оның жұбайы – Софья Ильинична қаладағы білікті гинеколог мамандарының бірі болған. И.С.Дурлештер 1993 жылға дейін №5 мектепте қызмет атқарған. 72 жасында кенже баласының қолына, немерелерінің жанына Самараға жол тартқан.
Ол химияны жанындай жақсы көрген. Оқушылардың да бұл пәнге деген қызығушылықтарын оятуға бар күш-жігерін салған. Өзі қызмет атқарған №5 мектепте «Жалпы және аналитикалық химия» кабинетін ашып, жабдықтаған. Оқушыларға химиялық реакцияларды, элементтердің қосылыстарын тәжірибе жүзінде көрсетіп, олардың бұл пәнді толық меңгеріп шығуларына барлық жағдайды жасаған.
Қажырлы еңбектің арқасында көптеген шәкірттерді тәрбиелеп, олардың болашағына үміт отын жаққан. Бүгінде И.С.Дурлештердің шәкірттері дәрігер, химия пәнінің білікті ұстазы, инженер т.б. қызметтер атқарып келеді.
Бүгінгі таңда ұлы тұлғаның 100 жылдық мерейтойына орай И.В.Панфилов атындағы мектеп-лицейінде «Дурлештер – мектебімнің ғасыр үні» тақырыбында еске алу кеші өтті. Қала мектептерінің мұғалімдерінің арасында волейбол жарысы өткізілді.
Еске алу кеші арнайы құрылған бағдарламаға сәйкес жүргізілді. Бағдарламаға сәйкес, №5 мектеп-лицей оқушыларына арнайы «Химияның таңғажайыптары» атты тәжірибе алаңы ұйымдастырылды.
Сонымен қатар №5 мектеп-лицейінің химия пәні мұғалімдері Зағира Рахымбекова мен Айнұр Қайырқұлова химия пәнінен ашық сабақтар көрсетіп, аймақтық мектеп мұғалімдерімен өз тәжірибелерін бөлісті.
Дурлештер Исаак Савельевичтің замандасы, Қазақ ССР халық ағарту ісінің озық қызметкері, Ы.Алтынсарин медалінің иегері, Қазақстанның еңбек сіңірген қызметкері, Қызылорда қаласының құрметті азаматы Подольский Марк Захаровичке арналған «Не стареют душой ветераны» атты мектеп-лицейінің оқушыларының қатысуымен сұхбат алаңы болып өтті.
Мектеп-лицей директоры Рита Мұхашова келген қонақтарға алғыс білдірді.
«Ел үмітін ер ақтар, ер атағын ел сақтар» – деп, дана халқымыз бекер айтпаса керек. Алайда әлеуметтік желіде И.С.Дурлештер жайлы ақпарат жоқтың қасы.
Ақпарат жедел алмасқан заманда осындай ел дамуына елеулі үлес қосқан тұлғаларды әлемге танытып, олар жайында ақпаратты кеңінен таратқан жөн. Энциклопедиялық оқулықтарды жаңартып, Дурлештер сынды құрметті азаматтардың есімдерін танымал тұлғалардың тізіміне қосып қоюды ұсынамын. Осы орайда Қызылорда облыстық мұражайына да кемеңгер ұстаздың еңбек жолына арналған бұрыштың ашылуы қолға алынса, ел тарихынан орын алар игі істің бастамасы болары хақ.
Фарида Бегманова,
И.В.Панфилов атындағы
5 мектеп-лицейінің қазақ тілі мен әдебиеті пәні мұғалімі
Жылдам ақпарат алу үшін Facebook, Instagram желілері мен Telegram каналымызға жазылыңыз!