«Халықтың сенімін ақтаудан артық абырой жоқ, болуы да мүмкін емес» деген Елбасы. Бұл – ұстаздың ғана емес, кез келген ұстамды жанның бағдаршамы екені анық. Бұл ретте Президент Қ.К.Тоқаевтың: «Мұғалімнің еңбегі – адамзат игілігімен астасқан өлшеусіз еңбек» деп айтқаны да мәлім. Қай мемлекет ұстаздарына қатысты қандай саясат ұстанса, мемлекеттің беделі де соған сай қалыптасады.
Ұстаз – барша адамзат дамуының шамшырақ тұлғасы. Ел мен елдіктің, білім мен біліктің ұйытқысы. Педагог – біріңғай ізгіліктен ғана тұратын кәсіп, ол – ұрпақ пен ұлтқа, адамзат пен болашаққа арналған нағыз өмір сүру салты. Тіпті дүниенің асылын іздеп, соны өзгеге үйретпекке ұмтылған жан қалауы. «Алты Алаштың баласы бас қосса, төрдегі орын мұғалімдікі», деп Мағжан Жұмабаев айтқан еді. Осы тұста, Елбасының бастамасымен әрі қоғамның жіті талқылауынан өткен «Педагог мәртебесі туралы» заң білім саласының мамандарын ғана емес, күллі халықты жақсылықтан үміттендірді. Заң ұстаздар қауымына әрі қорған, әрі ынталандыру болмақ.
Бүгінде білімге, мұғалімге қоғам көзқарасы өзгере бастады. Ұстазға көрсетіліп жатқан құрмет – жақсылықтың нышаны. Бұл – қалыптасқан дәстүрді сыйлау мен қастерлеудің жолы. Отбасы тәлімі мен елдік тәрбие – білім жүйесінің әрі өзегі, әрі айнасы. Біздің мақсатымыз – бәсекеге қабілетті білімді ұрпақ қалыптастыру.
Гүлжаһан Мнажадинова,
И.Әбдікәрімов атындағы Қызылорда аграрлық техникалық жоғары колледжінің қазақ тілі, әдебиет оқытушысы
Жылдам ақпарат алу үшін Facebook, Instagram желілері мен Telegram каналымызға жазылыңыз!