Оқу-ағарту министрлігі жаңа оқу жылында болатын өзгерістері жариялады, деп хабарлайды turkystan.kz.
1 қыркүйектен бастап барлық мектепте «Адал азамат» бірыңғай тәрбие бағдарламасы кеңейтіледі. Ал ата-аналар қауымдастығы мен білім беру ұйымдарының өзара іс-қимылын дамыту мақсатында ата-аналар комитеттері трансформациядан өтеді. Сонымен қатар бағдарлама құндылықтарына негізделген бірыңғай мектеп дизайн-коды кезең-кезеңімен жүзеге асырылады.
Басқа да өзгерістер:
Алматы облысының мектептерінде «Заң және тәртіп» пилоттық жобасы қолға алынады;
қараша айында «мектеп – ата-ана – қоғам» үштігінің ынтымақтастығын нығайтуға бағытталған алғашқы Республикалық ата-аналар комитеттері форумы өтеді;
мектеп процесіне жасанды интеллект элементтерін кезең-кезеңімен енгізу басталады;
«Келешек мектептері» үшін педагогтерді әзірлеудің үш деңгейлі оқыту моделі іске қосылады;
педагогтерді аттестациялауға арналған «Ұстаз» цифрлық платформасы толыққанды енгізіледі;
жас әрі талантты педагогтердің деректер қоры қалыптастырылады;
Абай атындағы республикалық мектеп-интернат «Абай ұлттық мектебі» болып қайта ұйымдастырылады;
барлық мектепте ыстық тамақ ақысы тек ваучерлер және «Әлеуметтік әмиян» жүйесі арқылы төленеді;
мектептер мен колледждерде буллингке қарсы «DosbolLIKE» бағдарламасы енгізіледі.
Бұдан бөлек, биыл күзде Алматыда инклюзивті білім бойынша алғашқы Дүниежүзілік конгресс өтеді. Ал қазан айында Ақтауда жұмысшы мамандықтар бойынша алғашқы халықаралық TurkicSkills чемпионаты ұйымдастырылады.
Жылдам ақпарат алу үшін Facebook, Instagram желілері мен Telegram каналымызға жазылыңыз!