Қаладағы С.Лапин атындағы № 261 мектепте «Лапин шоу» оқушылар театры құрылған болатын. Қазіргі уақытта жаңа жоба өз нәтижесін беріп, оқушылар сахнада өнер көрсетуде.
– Театр жобасын енгізудегі мақсат – оқушылардың шығармашылығын дамыту, адамгершілікке тәрбиелеу, баланың сөйлеу мәнерін жақсарту, көпшілік алдында өзін ұстай білуіне, жан-жақты дамуына ықпал жасау. «Лапин шоу» оқушылар театры құрылғанда алғашқы 5-9 сыныптар аралығында балаларға «Кастинг – 2021» жарияланды. Осылайша театрға талантты, өнерлі шәкірттерді қабылдадық. Әрбір баланың мүмкіндігін жетілдіру мен жақсартудың жолдарын іздеуде жұмыс істеп жатырмыз. Әр оқушының мақсатқа жетуіне көмектесеміз, – дейді С.Лапин атындағы №261 орта мектептің педагог-ұйымдастырушысы Шолпан Күздеубай.
Театр мүшелері аймақтық жарыстарға белсене қатысуда. Мәселен, Ахмет Байтұрсыновтың 150 жылдығына орай аймақтық мектептер арасында өткен «Қазақ халқының рухани көсемі» атты сахналық қойылымға «Ахметтің аманаты» қойылымын сомдап жүлделі 3-орын иеленген. А.Байтұрсыновтың рөлін сомдаған 6 «А» сынып оқушысы Дулат Кеңесбай «Үздік актёр» аталымын жеңіп алған.
Театр өнеріне балалардың қызығушылығы күн санап артуда. Биылғы оқу жылында театрдағы оқушылар саны 300-ге жеткен. Жаңа оқу жылы театр оқушылары үшін жеңіспен басталды деуге болады. Атап айтсақ, «Театрдың ғажайып әлемі» республикалық фестиваль-байқаудың облыстық кезеңінде «Лапин шоу» театры өнер көрсетіп, жүлделі орындармен марапатталған. Сондай-ақ мектептегі театр ұжымы «Шығармашылық пен шеберлік көрсеткені үшін «Дарын» облыстық білім беру орталығының алғыс хатын иеленді.
– Театр мектеп қабырғасынан оқушылардың өнерге құштарлығын оятып, олардың шығармашылық қабілетін ашуға мүмкіндік береді. Осы орайда мектепішілік қойылымдар жүйелі түрде қойылады. Мұндай игі жоба жас буынды өнерге баулып, театр әлемімен жақынырақ таныстыруға бағытталған. Театр өнері аса талғампаздық пен шынайылықты талап етеді. Кәсіби актерліктен алыс болса да жас өнерпаздар басты рөлдерді шебер сомдап шығуда. Көрермендерді сендіріп, көзге ыстық жас келтіруде. Мұндай күрделі қойылымдар оқушылардың киелі сахнаға төселіп қалыптасуына үлкен септігін тигезері анық, – дейді атындағы №261 орта мектептің педегог ұйымдастырушысы Шолпан Қонақбайқызы.
Талантты балалардың басын біріктіретін үйірменің оларға берері көп. Жобаның мүшелері де сахнада өздерін еркін ұсатуға, кейіпкер бейнесін ашуға, шығарманың мазмұнын толық түсініп, сахналап шығуға машықтанып келеді. Театр – тәрбие мектебі, театр – тәлім, рухани азық алар орда. Ол – көрінгеннің ермегі емес, үлкен еңбек.
Жылдам ақпарат алу үшін Facebook, Instagram желілері мен Telegram каналымызға жазылыңыз!