Бала – жарқын болашағымыздың кепілі. Оның тәрбиелі болып өсуі кез келген ата-ана үшін зор мақтаныш. Бала бойында тәрбие мен білімнің қатар ұштасуы оны үлкен жетістіктерге жетелейді. Ер бала елінің айбары болса, қыз бала абыройы. Халқымыз қашанда қыз баланың тәрбиесіне аса қырағылықпен қараған. Байырғы үлкендеріміз қыз баланың бұрымына шашбау тағып, сол арқылы биязы мінезін қалыптастырып отырған. Бұл үрдіс бүгінгі күні де дәріпті жолын жалғастырып келеді. Өйткені халқымыз үшін қыз бала қай кезде де қадірлі болып, өзі өсіп-өнген әулетінің беделіне баланған.
Жуырда Абылай хан атындағы №140 қазақ орта мектебінде «Тәрбиелі зияткер ұрпақ – болашақ кепілі» тақырыбында облыстық әлеуметтік-ғылыми ашық алаң болып өтті. Оған онлайн режимде 300-дей қыз бала қатысты.
– Бүгінгі жиында біздің басты бағытымыз қыз балаларды халқымыздың әдет-ғұрпын, салт-дәстүрін қадірлейтін ұлтжанды, отансүйгіштік сезімдерге тәрбиелеу болып табылады. Отбасы – Отанның бір бөлшегі екенін ұғындырып, оқушылардың бақытты отбасыға деген қызығушылығын арттыру. Қоғамның қажеттілігіне қарай әрбір оқушының қабілеті мен бейімділігін ескере отырып, мамандық таңдауға көмектесу. Осындай өнегені бойына сіңіріп өскен жеткіншек келешекте жан-жақты рухани бай болып, елінің тағдыры үшін жауапкершілікті сезіне алатын болып өседі. Мәңгілік ел болу жолындағы ұлы істерге белсенді қатысатын азамат болады деп сене аламыз. Оқушының білімімен қатар жан-жақты дамуына қолдау білдіру мақсатында мектебімізде 6 кіші мектеп, 18 жоба жұмыс жасауда. Ол бүгінгі шарада жан-жақты көрсетілетін болады, – деді мектеп директоры Айгүл Нәжмадинқызы.
Облыстық шара «Отбасы кіші мектеп», «Жасыл ғаламшар» және «Әлеуметтік-ғылыми кіші мектеп» жобалары бойынша үш бөлімнен тұрды.
Шараға облыстық Қазақстан Халқы Ассамблеясы жанындағы аналар кеңесінің төрайымы Рахима Ахметова, «Ақ босаға» қоғамдық бірлестігінің төрайымы Меруерт Аңсатова, облыстық әйелдер кеңесінің төрайымы Райкүл Байназарова, Абай атындағы үш тілде оқытатын дарынды балаларға арналған мектеп директоры Жанат Сәдуақасова және тағы басқалар қатысып, тақырып төңірегінде тұщымды ойларымен бөлісті.
Тағы бір атап өтерлігі мектепте венчурлық жүйені дамыта отырып, «Метеорология» тәжірибелік-зерттеу алаңының ашылуы. Сонымен қатар «Жасыл Қазақстан» ұлттық жоспарын жүзеге асыру, экологиялық білім беру бағдарламасын игеру негізінде және экологиялық тәрбие беру мақсатында білім ордасында «Жасыл ғаламшар» кіші мектебі құрылған. «Жасыл ғаламшар» кіші мектебінің аясында «Green study» жылыжай ғылыми-зерттеу оқу орталығының және «Метеорология» тәжірибелік-зерттеу алаңының ашылуы оқушылар үшін үлкен еңбектің бастауындай болып отыр. Сондай-ақ «Global eco» жобасы да оқушылар мен ұстаздардың бірлескен жүйелі жұмыстарының нәтижесі.
Жылыжай кешенінің ашылуына облыстық білім басқармасының басшысы Ақзира Қасымова арнайы қатысып, жасыл экономиканы дамытудағы мектеп ұжымының еңбегіне алғысын білдірді.
– Бұрын қандай бір іс шара ұйымдастырылса да ол бір бағытта немесе бір тақырып төңірегінде өрбитін еді. Ал бүгінгі біз қатысқан жиынның жөні мен жолы өзгеше екенін көріп көңіліміз толды. Мұның астарында қаншама ұстаздың жылдық тәжірибелері мен еңбектері жатқанын атап өту керек. Соңғы қоңырау соғылар сәтте серпінді істің куәсі болдық. Бұл біріншіден, балалар үшін үлкен естелік. Екіншіден, мың жылдық рухани азық боларлық дәріпті дүниелердің діңгегі, – деді «Ақ босаға» қоғамдық бірлестігінің төрайымы Меруерт Аңсатова өз сөзінде.
Тұрар БЕКМЫРЗАЕВ
Жылдам ақпарат алу үшін Facebook, Instagram желілері мен Telegram каналымызға жазылыңыз!