WhatsApp әзірлеушілері ата-аналарға балалар үшін шектеулері бар қосымша есептік жазба ашуға мүмкіндік беретін жаңа функцияны енгізуді жоспарлап отыр, деп хабарлайды Zakon.kz.
Қосымша есептік жазба – мүмкіндіктері шектелген жеке профиль болып саналады және ол балаларға арналады. Егер кәмелетке толмаған пайдаланушы WhatsApp белгілеген ең төменгі жас талаптарына сай келмесе, ата-анасынан қосымша есептік жазба ашуды сұрауы қажет болады. Бұл есептік жазба арқылы бала өз байланыстар тізімінде жоқ пайдаланушылардан хабарлама немесе қоңырау қабылдай алмайды әрі оларға хабар жібере алмайды.
Сонымен қатар, қосымша есептік жазба ата-аналарға баланың белсенділігі туралы белгілі бір мәліметтерді көруге мүмкіндік береді. Мысалы, жаңа байланыстардың қосылғаны жөнінде ақпарат ұсынылады. Алайда бұл есептерде чаттардағы хабарламалардың мазмұны көрсетілмейді, деп жазады Wabetainfo.
Есептік жазбаны жасау кезінде сәлемдесу экранынан кейін ата-анаға арнайы QR-кодты сканерлеу қажет болады. Сәйкестендіру аяқталған соң, ата-ана негізгі PIN-код орнатады. Бұл алты таңбалы код ата-анаға белгілі бір әрекеттерді орындауға мүмкіндік беріп, балалар тарапынан рұқсатсыз өзгерістер енгізілуінің алдын алады. PIN-код орнатылғаннан кейін оны қосымша есептік жазбаға енгізу арқылы профильді құру толық аяқталады.
Бұл есептік жазбалар кәмелетке толмағандардың қауіпсіздігін арттыру мақсатында шектеулі мүмкіндіктермен жұмыс істейді. Балалар «Жаңартулар» бөліміне кіре алмайды. Бұл бөлімде байланыстармен және көпшілікпен мазмұнды жылдам бөлісу құралдары ұсынылады.
Қосымша есептік жазба ата-ана оны өшіруді шешкенге дейін немесе пайдаланушы WhatsApp қолдану шарттарында көрсетілген рұқсат етілген жасқа жеткенге дейін қолданыста болады. Белгіленген жасқа толғаннан кейін қосымша есептік жазбаны негізгі есептік жазбадан ажыратуға болады, содан соң пайдаланушы WhatsApp-тың барлық мүмкіндіктеріне толық қол жеткізеді.
Жылдам ақпарат алу үшін Facebook, Instagram желілері мен Telegram каналымызға жазылыңыз!