TikTok әлеуметтік желісіне ықтимал тыйым салу туралы заң жобасына АҚШ президенті Джо Байден қол қоюға ниетті. Бірақ ол үшін конгресс тиісті шешім қабылдауы керек.
Өкілдер палатасының энергетика және сауда комитеті қытайлық ByteDance компаниясына АҚШ-тағы әлеуметтік желіні бұғаттау қаупімен өзіне тиесілі TikTok-ты сатуға бұйрық беретін заң жобасын мақұлдады, деп жазады РИА Новости. Бұл жағдайды журналистерге Америка президенті түсіндірді. «Егер олар оны қабылдаса, мен оған қол қоямын», – деді Байден. Ал өз кезегінде TikTok өкілдері АҚШ-та әлеуметтік желіге тыйым салу 170 миллион америкалықты сөз бостандығына конституциялық құқығынан айырады деп мәлімдеді. Бір жылдан астам уақыт бұрын АҚШ-тың мемлекеттік университеттері студенттерге кампустардағы Wi-Fi желілерін пайдаланып, TikTok-ты пайдалануға тыйым салған еді.
Президент Джо Байден әкімшілігі әлеуметтік желі АҚШ-тың ұлттық қауіпсіздігіне қауіп төндіруі мүмкін деп алаңдайды – шенеуніктер қытайлық TikTok иелерінен компаниядағы өз үлестерін сатуды талап етеді, әйтпесе Штаттар аумағында қолданбаға тыйым салынуы мүмкін екен.
Былтырғы мамырда АҚШ-тың солтүстік-батысында орналасқан Монтана штатының губернаторы Грег Джанфорте штаттағы TikTok әлеуметтік желісіне тыйым салу туралы заң жобасына қол қойған болатын.
Ақпарат көзі: kaz.nur.kz
Жылдам ақпарат алу үшін Facebook, Instagram желілері мен Telegram каналымызға жазылыңыз!