Астанада Қазақстанның инвестициялық тартымдылығын зерттеу нәтижелерін таныстыру туралы халықаралық жиын өтті. Іс-шараға Ұлттық экономика министрі Әлібек Қуантыров қатысты. Бұл туралы Ұлттық экономика министрлігінің баспасөз қызметі хабарлады.
Панельдік сессия аясында экономика министрі қазіргі геосаяси жағдайда ел экономикасының дамуына қатысты бірқатар сұрақтарға жауап беріп, әлеуметтік-экономикалық реформалардың іске асырылу барысы туралы айтты.
Сондай-ақ министр инвестициялық ахуалды жақсарту мен инвесторларды қолдау құралдарын жетілдіру бойынша жүргізіліп жатқан жұмыстарға да тоқталды. Бұл бағыттағы оң динамика EY компаниясы «Euromoney» және «fDI Market Intelligence»-пен бірлесіп жүргізген зерттеу нәтижелерінде айтылды.
Сауалнамаға әлемнің түкпірінен 116 шетелдік инвесторлар қатысқан. Сауалнамадан өткен компаниялардың 33-інің 1,5 млрд еуродан асатын және 83 компанияның 1,5 млрд еуродан төмен айналымы бар. Шетелдік сарапшылардың айтуынша, бүгінде Қазақстан өңірдегі инвестициялар үшін ең танымал елдердің біріне айналды. Сауалнамаға қатысқан инвесторлардың үштен екісінен астамы Қазақстанда өз қызметін жүргізіп жатыр.
Жиында шетелдік бизнес өкілдері тарапынан бірқатар ұсыныс айтылды. Соның ішінде қолайлы нормативтік орта және экономиканы білікті кадрлармен қамтамасыз ету, цифрлық экономиканы дамыту, сондай-ақ салық салудың әділ және ашық тәсіліне жәрдемдесу мәселесі көтерілді.
Жылдам ақпарат алу үшін Facebook, Instagram желілері мен Telegram каналымызға жазылыңыз!