ҚР Президентінің «Алтын сапа» сыйлығы жыл сайын өтеді. Байқаудың басты мақсаты – отандық өнімнің сапасын арттыру. Осы тұрғыда компанияларға қойылатын басты критерийлер белгіленген – ұйымның өнім өндіру немесе қызмет сапасы саласында елеулі нәтижелерге қол жеткізуі, өнімнің қауіпсіздігін қамтамасыз етуі, сондай-ақ ұйымның сапаны басқаруда жоғары тиімді әдістерді енгізуі бағаланады.
Қызылорда облыстық кәсіпкерлер палатасы баспасөз қызметінің мәліметі бойынша биыл байқауға қатысу үшін 281 компания өтінім берді. Оның төртеуі Қызылорда облысының кәсіпорны.
Олар:
– «Азық-түлік тауарларын немесе ауыл шаруашылығы өнімдерін шығаратын үздік кәсіпорын» аталымы бойынша күріш өндірісімен айналысатын «Асыл дән LTD» ЖШС;
– «Өндiрiстiк мақсаттағы үздiк кәсiпорын» аталымы бойынша цемент өндіретін «Компания Гежуба Шиели Цемент» ЖШС мен поливинилхлоридтен және төмен қысымды полиэтиленнен жасалған құбыр өнімдерін өндіретін «Казахстанская Нефтехимическая Компания Кемикал» ЖШС Қызылорда филиалы;
– «Қызметтер көрсететiн үздiк кәсiпорын» аталымы бойынша мұнай кәсібіне арналған жабдықтарды әзірлеу, өндіру, жеткізу, сервистік қызмет көрсету және жөндеу бойынша қызметтер көрсету «Новомет-Казахстан» ЖШС.
Жалпы «Алтын сапа» сыйлығын алуға арналған байқауда сыйлық жыл сайын «Өндірістік мақсаттағы үздік кәсіпорын», «Халық тұтынатын тауарларды шығаратын үздік кәсіпорын», «Азық-түлік тауарларын және ауыл шаруашылығы өнімдерін шығаратын үздік кәсіпорын», «Қызмет көрсету саласындағы үздік кәсіпорын» санаттары бойынша тағайындалады.
Гүлмира ДІЛДӘБЕКОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!