Сыр диқандары осы жылғы егін жинауды нәтижелі аяқтады. Биыл 188,5 мың гектар жерге егін егіп, оның ішінде негізгі дақыл – күріштің көлемі 78,6 мың гектарды құрап, әр гектардан 56,7 центнерден өнім алынды.
Соңғы жылдары аймақтағы егін шаруашылығы саласының маңызды мәселесі – су тапшылығы еді. Осыған орай биыл Үкімет резервінен 3,6 млрд теңге қаржы бөлінді. Нәтижесінде 21 канал тазалау, 52 ұңғыманы қалпына келтіру мен бұрғылау жұмыстары жүргізіліп, қашыртқы суларды қайта пайдалану және елді мекендерді аяқ сумен қамтамасыз ету мақсатында 133 дана насос қондырғылары сатып алынуда.
Айта кету керек, биыл су тапшылығын ескере отырып, өткен жылмен салыстырғанда 5 мың гектар күріш алқабы қысқартылды. Оның орнына суды аз қажет ететін мал азықтық дақылдар мен қатар картоп, көкөніс, бақша өнімдерінің егіс көлемдері 7,3 мың гектарға ұлғайтылған. Атап айтсақ, 1945 гектар жүгері, 189 гектар соя, 358 гектар қант құмайы, 3,5 гектар қант қызылшасы егілді. Бүгінде күзгі егін жинау науқаны оңтайлы мерзімінде жүргізіліп, толық аяқталды.
Бұл туралы өңірлік коммуникациялар оратылығында өткен брифингте облыстық ауыл шаруашылығы және жер қатынастары басқармасының басшысы Талғат Дүйсебаев мәлімдеді.
– Күзгі егін жинау науқанының аяқталуына орай облыс әкімінің қатысуымен «Алтын дән-2022» мерекелік шарасы өтті. Мұнда облыстың агроөнеркәсіптік кешені бойынша үздік жетістіктерге жеткен 67 озат марапатталды. Сонымен қатар Қызылорда қаласы мен барлық аудандардың қатысуымен ауыл шаруашылығы өнімдерінің жәрмеңкесі ұйымдастырылды. Сыр диқандары 2000 тоннаға жуық 500 млн теңгенің ауыл шаруашылығы өнімдерін халыққа нарық бағасынан төмен бағада ұсынды. Алдағы уақытта аталған шара барлық аудандарда жалғасын тауып, ауыл шаруашылығы саласы озаттары марапатталады, – деді басқарма басшысы.
Қай кезде де Сыр өңірінің күріші үлкен сұранысқа ие. Бүгінде Сыр диқандары еліміз бойынша халықтың қажеттілігін толық қамтамасыз етіп отыр. Сондай-ақ алыс-жақын шет елдерге де өнімдерін экспорттауда.
Ақмарал ОЛЖАБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!