Қала әкімі Нұрлыбек Нәлібаев ақын, журналист Рысты Бекбергенованы қабылдады.
Ақпарат айдынында 30 жылдан астам уақыт қызмет еткен журналист өмір жолында шығармашылығын өлеңмен әрлеген жан.
Бүгінде 90 жасқа келсе де өзінің өнегелі өмірін өлеңмен өрнектеген ақынның «Тұңғыш кітап», «Ана жүрегі», «Жырға сапар», «Өмірім өлеңмен өрнектелген», «Өмірдің ақ-қарасы» сынды жыр жинақтары оқырман қауымның көңілінен шыққан сомды дүниелер. Жуырда ақынның тағы бір жыр жинағы жарыққа шықты. Қала әкімдігінің қолдауымен жарық көрген өлеңдер жинағы «Өлеңім – менің тұңғышым» деп аталады.
Кездесуде қала басшысы жаңа жинақты ақынға табыстады.
– Бұл кітапты енді қаламыздың кітапханаларына қойып, оқырмандардың қолдан-қолға алып оқуына мүмкіндік жасайтын боламыз. Алдағы уақытта да шығармашылығыңызды кеңінен танытуға үлкен қолдау болады, – деді шаһар басшысы.
Бес жүз данамен басылған кітаптың жарыққа шығуына қолдау білдірген қала әкіміне Рысты Сейітжанқызы алғысын білдіріп, ақ батасын берді.
Жылдам ақпарат алу үшін Facebook, Instagram желілері мен Telegram каналымызға жазылыңыз!