Бұқар жырау атындағы әдебиет және өнер музейінде қазақ киносының аңызы Асанәлі Әшімовтің жеке заттары қойылған кабинет ашылды. Онда актердің киген шапаны, шахмат тақтасы, үстел үсті жиынтықтары және өзге де пайдаланған жеке заттары, фотосуреттері қойылған,-деп хабарлайды KAZINFORM.
Асанәлі Әшімов – қазақ киносын әлемдік деңгейге көтерген актерлердің бірі. Театр саласында да майталманның еңбегі жарқырап көрінді. Музей-кабинеттің ашылу салтанатында актердің өзі атап өткендей, «Өнердің жаны – құштарлық, жауы – іштарлық».
«Өнер өлкесінде атың естіле бастаса, дұшпаның көбейетіні болмысымызда бар. Адам сынмен өседі, айтыс-тартыста шыңдалады. Шарболаттай әбден жетіліп шығып, өнердің көгінде қалықтататын шабыт шіркіннің таусылмағаны абзал. Бүгін ерекше толқып отырмын. Бұқар жырау музейі мен үшін айрықша сый жасады. Жастық шағымдағы, кино мен театрдағы ұмыт болған кейбір естеліктер ойға қайта оралып отыр. Сирек фотосуреттерді көрдім. Музейдің бұл музей-кабинеті менің жеке тұлғама емес, қазақ киносына жасап отырған тартуы деп ұғындым. Керекудің топырағы құйқалы, Жұмат Шаниндай ұлттық театр өнерінің негізін салушы тұлғаны, Шәкен Аймановтай қазақ киносының атасын дүниеге келтірді. Қаншама театр және кино актерлері, өнер адамдары өсіп шықты. Сол аталарымыздың қасиетті рухы бүгінгі ұрпақты желеп-жебеп, елдің азаматтары өнерді әс көтеріп жатқаны мені айрықша қуантады. Музей деген өткенді жұртпен табыстыру, руханиятты насихаттау болса, бүгінгі өнегелі іс осы үдеден толықтай шығып отыр», – деп алғысын жеткізді Асанәлі Әшімұлы.
Актердің қатысуымен көптеген кинокартина Павлодар облысының Баянауыл ауданында түсірілген. Олардың арасында «Қозы Көрпеш – Баян сұлу» сияқты қазақ киносының шедеврін атап өтуге болады. Жер бедері көркем, фильм түсіруге жайлы өлкеге кезінде Шәкен Айманов, сондай-ақ өзге де режиссерлер өздерінің түсірілім топтарын жиі әкелген.
Бұқар жырау атындағы әдебиет және өнер музейінің басшысы Ербол Қайыров кабинетті ашудағы мақсат жұртшылықты есімі аңызға айналған Асанәлі Әшімовтың өнер жолымен таныстырып, жастарға үлгі ету екенін атап өтті.
Еске сала кетейік, Павлодарда «Ертіс-Баян» І республикалық театр фестивалі басталды.
Жылдам ақпарат алу үшін Facebook, Instagram желілері мен Telegram каналымызға жазылыңыз!