Кеше Ә. Мәмбетов атындағы мемлекеттік драма және комедия театры М.Шахановтың «Танакөз» драмасын қызылордалық көрерменге ұсынды. Спектакльді Қазақстанның Еңбек Ері, Қазақстанның Халық жазушысы Мұхтар Шаханов, облыс әкімінің орынбасары Шахмардан Байманов, облыстық мәдениет, архивтер және құжаттама басқармасының басшысы Жанмұрат Сейілов, мәдениет өкілдері және қала тұрғындары тамашалады.
«Танакөз» поэмасының негізгі арқауы – достық пен махаббат. Майдан даласында қан кешіп жүрген екі әкенің адал достығы олардың ұрпағы Мұхтар мен Мұраттың достығына жалғасты. Майданда қан кешкен айнымас достардың ұлдары әкесіз өсті, алайда олардың жолын бағып, тілеуін тілеп, дұғасына қосып отырған қос ана бар еді. Тел қозыдай бірге өскен екі жігіттің ортасында өскен Танакөзге айнымасқа серттескен қос достың көңілі бір сәтте ауады. Ендігі жерде олар бір-бірімен жарыса бастайды. Ғашық жан екеу, Танакөз жалғыз. Араға сызат түссе, қиын. Шынайы махаббат жеңе ме, нағыз достық жеңе ме? Осындай әрі-сәрі күйде отырған көрерменді Мұрат өз шешімімен таңғалдырады. Сұлу бойжеткенді досы Мұхтарға қиып, махаббатын мәңгілікке жүрегіне түйіп, қаладан енді келген Зеркүлге үйленіп, шаңырақ көтереді. Алайда Мұраттың бұл шешімі Мұхтар мен Танакөздің тағдырының қосылуына оң әсер етпейді. Абайсызда трактордың астында қалып екі аяғынан айырылған Мұраттың қайғысына шыдамаған анасы қайтыс болады. Осыдан соң екі арада сезім жоғын білетін Мұрат Зеркүлге шындықты айтып, екі жаққа кетуді ұсынады. Жан досының басындағы ауыр жағдайды естіп келген Мұхтар Мұраттың қасынан Танакөзді көреді. Соңында екі ғашықтың бір-біріне деген сезімі шынайы екенін түсінеді. Қойылым соңында үш дос Ақсу суына шомылып, бала кездегідей ойнайды.
Қызылордалық көрермендер Ә. Мәмбетов атындағы мемлекеттік драма және комедия театрының өнеріне қошеметін білдірді.
Жылдам ақпарат алу үшін Facebook, Instagram желілері мен Telegram каналымызға жазылыңыз!