Бүгінгі кейіпкеріміздің өмір салты тым бөлек. Ол әдемі қартаюды ойлап жүр. Ал әдемі қартаю дегеніміз не дейсіз бе? Өзгеден ілік іздемей, өзіне уақыт арнап, бақытты болу. Өкінішке қарай, қазір өзінің емес, өзгенің өміріне де жағаласатындар аз емес. Осы тұста зейнет жасына таяған кәсіпкер, саяхат пен салауатты өмір салтын берік ұстанған – Гүлмира Нұғманқызымен әңгімелесудің сәті түсті.
Гүлмира Нұғманқызы – шағын кәсіп иесі әрі белсенді саяхатшы. Оның айтуынша, спортпен айналысу үшін міндетті түрде фитнес клубқа жазылып, біреудің қадағалауында болу шарт емес. Ең бастысы, адамның өз нәпсісін жеңіп, өзін қадағалай білуі.
– Адам қай жаста болсын, өз нәпсісін жеңуге дағдылануы керек. Мәселен, таңертең ерте тұрып, жүгірудің өзі адамға энергия береді. Мұны бәрі бірдей түсіне бермейді. Мен күн сайын ерте тұрғаныма шүкіршілік айтып, әр күніне риза боламын. Ғылыми тұрғыда мұны «аффирмация» дейді. Ал спортпен айналысу үшін әдемі саябақ не заманауи спорт залдың қажеті жоқ. Өз аулаңда шынығып, өз көшеңде жүгірсең жеткілікті. Дегенмен қазір қала көркею үстінде. Саябақтар қайта жөңдеуден өтіп, тұрғындарға пайдалануға берілді. Арнайы спорт алаңдары да бар, – дейді ол.
Белсенді өмір салтын ұстану мен жаяу жүру дағдысын Гүлмира Нұғманқызы шетелге саяхаттаған шағында қалыптастырған екен.
– Осыдан жеті жыл бұрын шетелге алғаш шыққанда адамдардың жаяу жүретінін байқадым. Олар көліксіз-ақ, картаға қарап, өз бағытын жаяу жүріп табады. Сол сәтте мен де осы әдетті өз өміріме енгізуді ұйғардым. Бір күні 20 мың қадам жүргенімді байқап, өзім таңғалдым. Шаршағанымды да сезбедім. Жаяу жүру бұл спорттың бір түрі екен. Ал біз қалада жаяу жүрмек түгілі, бес шақырым жерге такси шақырамыз ғой. Осыдан кейін салауатты өмір салтын ұстануға бекіндім. Жеті жыл болды, салауатты өмір салтын берік ұстанып келемін, – дейді кейіпкеріміз.
Ол спортпен жалғыз айналыспайды. Зейнеткерлерден құралған белсенді топтың ұйымдастырушысы. Бұл топта елуден асқан ақжаулықтылардың өз спорт клубы бар екен.
– Қазір біздің белсенді спорт клубымызда отыздан аса адам бар. Бірі қант диабетімен, енді бірі қан қысымымен ауырады. Бірақ бәріміздің мақсатымыз бір – әдемі қартаю, салауатты өмір салтын сақтау. Күн сайын таңғы 07:00-ден 09:00-ге дейін жаттығу жасаймыз. Келем деген жанға есігіміз әрдайым ашық. Ең бастысы, тегін, – дейді ол.
Бұл клуб – тек белсенді зейнеткерлердің ғана емес, сырлас әрі замандас жандардың бас қосатын ортасына айналған.
– Біз барлығымыз дерлік замандасымыз. Балалары басқа қалада жұмыс істейтін, үйде төрт қабырғаға телміріп жалғыз қалған зейнеткерлер көп. Солар біздің қатарымызға қосылып, қуанып жүр. Достар, сырласар жан табады. Ай сайын спорттан бөлек, бірге атқа мінуге, боулингке, бассейнге барамыз. Тіпті, бір-біріміздің туған күнімізді атап өтеміз. Ең бастысы, аз ғана ғұмырымызда бір-бірімізге демеу болып, денсаулық пен жақсы көңіл-күй сыйлап жүруге тырысамыз, – дейді Гүлмира Нұғманқызы.
Иә, салауатты өмір салтын ұстану жас талғамайды. Ең маңыздысы, өз жаныңды түсінетін орта мен жақсы ниет.
Айдана БАХТИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!