8-наурыз халықаралық әйелдер күні арулар үшін ғажап күн. Шуақты сәтті нәзік жандар асыға күтеді. Себебі ұлт ұясының отанасы, әлемнің әдемілігі мен табиғаттың таңғажайып сұлулығы мен мейірімін бойына жиған әйелдер қауымына құрмет ерекше. Осындай аяулы жанның бірі – Абай атындағы үш тілде оқытатын дарынды балаларға арналған мамандандырылған сыныптары бар мектеп директоры Айгүл Алтынбекқызы Өткелбаева. Қазақ қызына тән биязылығына қоса өте белсенді, ұйымдастырушылық қабілетімен ерекшеленген мектеп басшысымен мереке қарсаңында сұхбаттасудың сәті түсті.
– Көктемнің алғашқы мерекесі 8 наурыз күнін қалай тойлайсыз? Сізге несімен ерекше?
– 8 наурыз мен үшін күнтізбедегі жай ғана демалыс күні емес, бұл – Табиғат-Ананың оянуымен үндескен мереке. Қысқы ұйқыдан оянған Жер-Ана қалай түрленіп, айналасына өмір сыйлай бастаса, әйел заты да солай бүкіл тіршіліктің, шуақтың және мейірімнің бастауы. Бұл күннің кереметі – айналаның жасыл желекке оранып, бәйшешектердің бой көтеруімен, табиғаттың түрленуімен тұспа-тұс келуі. Мен үшін бұл мереке нәзіктік пен қуаттың тоғысуы. Сондықтан міндетті түрде жақындарыма жылу сыйлап, анама деген шексіз алғысымды білдіруден бастаймын.
Әйел, ана – отбасының күні болса, көктем жылдың жарқыраған күні іспеттес. Әйел заты да көктем секілді айналасына өмір сыйлап, жылу береді. Сондықтан бұл күн маған әйел бақытының, ана махаббатының қаншалықты құдіретті екенін тағы бір мәрте еске салатынымен қымбат.
– Белсендісіз. Қайнар күшті қайдан аласыз?
– Сөзіңіздің жаны бар. Көпшілік «шаршамайсыз ба?» деп сұрап жатады. Менің негізгі күш-қуатым ішкі үйлесім мен сүйікті ісімде. Ең бірінші, отбасымның қолдауы, үйдегі атмосфера маған қанат бітіреді. Әрбір ісімнің жемісін көру, біреуге пайдаң тигенін сезіну – ең үлкен мотивация. Өзім жақсы көретін іспен айналысқанда шаршауды ұмытамын. «Адамның жаны сұлу болса, тәні де қуатты болады» деген ұстанымды ұстанамын. Екінші қолдау – ол шәкірттерімнің білім алуға деген ниеті мен шамшырақтай жанып тұрған көзі. Балаларды жақсы көремін. Баланы алдай алмайсың, оларға өз энергияңды жұмсап, біліміңді берсең, олар бала махаббаттарымен қайтарады. Сондықтан шаршадым деп айтуға болмайды. Үшінші күш-қуатымның қайнар көзі – табиғатпен үндестікте. Көктем басталысымен көгалдандыру ісін бастап кетемін. Табиғат-анаға қызмет етсең, жемісін еселеп береді. Осы кезге дейін көгалдандыру жұмысына өз үлесімді қосып жүрген қоғам мүшесімін десем қателеспеймін. Көктемде күн сәулесі жер бетін қалай жылытса, мен де айналамдағы шәкірттеріме, ұжымыма және отбасыма сондай шуақ шашуға тырысамын. Ағаштың бүршік жаруы, өзеннің гүрілдеп ағуы маған ерекше серпін береді. Табиғат оянуынан жаңа идеялар мен шабыт аламын. Атқарылған істің жемісін көру өмірлік бақыт деп ойлаймын.
Асүйімде де «көктемгі серпіліс» жасағанды ұнатамын. Көктем келісімен, ағзаға қуат беретін, жасыл шөптер мен пайдалы өнімнен дайындалған тағамдар әзірлеймін. Әрине, ұлттық нақыштағы дәстүрлі ас – біздің дастарханның сәні. Асхана – менің шығармашылық бөлмем. Отбасым үшін ерекше дәмдеуіштер қосылған ұлттық тағамдарды және соңғы кезде дәруменге бай заманауи салатты жиі әзірлеймін. Әсіресе демалыс күндері біз отбасымызбен бірлесіп ерекше ас пісіруді дәстүрге айналдырғанбыз.
– Кітап оқуға уақыт табасыз ба?
– Жан дүниемді байыту үшін классикалық әдебиет пен тұлғалық даму кітаптарын көп оқимын. Бір мезгілде бірнеше шығарманы қатар оқимын. Оқып қана қоймай, сол сюжетке түсірілген фильмді көріп, автордың айтқысы келген идеясына баға беруді ұнатамын. Әдебиеттегі кейіпкерлердің тереңдігін түсінуге тырысып, қара сөздің құдіретін сезінгенді жаным сүйеді. Сонымен қатар көктемгі табиғат көрінісінен шабыт алып, ой толғаймын. Топырақтың иісін сезіну, алғашқы гүлдерді тамашалау – мен үшін баға жетпес демалыс.
– Әйел бақыты неде?
– Мен бақытты жармын, төрт баланың анасымын, ата-анамның аяулы қызымын, ата-енемнің үлкен келінімін. Тәңірім берген нығметке жарық күніне ризашылық етемін. Әйел адам бақытты болу үшін көп нәрсе қажет етпейді. Еліміз аман, жұртымыз тыныш болса, отбасында төрт көзіміз түгел болса, анаға одан артық бақыт жоқ. Әрбір ана бақытты болуға лайық.
– Мерекеге лебізіңіз…
– Қадірлі аяулы аналар, нәзік жандар! Табиғат-Ана түрленіп, дүние жаңарған шуақты шақта көңілдеріңізден көктем кетпесін. Сіздердің мейірімдеріңіз қатып қалған мұзды ерітетін күн нұрындай қуатты. Жандарыңыз әрдайым гүлдей жайнап, өмірлеріңіз бақыт пен шаттыққа толсын. Әрбір атқан таң тек жақсылық пен жаңа мүмкіндіктер ала келсін. Әлемнің ажары, отбасының тірегі болып, шуақ шашып жүре беріңіздер. Әрбір әйел заты бақыт үшін жаралған әлемнің ажары. Күлкілеріңізден әлем нұрлана түссін. Жандарыңыздан көктемнің жылуы, көңілдеріңізден гүлдердің хош иісі кетпесін. Шаңырақта береке, отбасында тыныштық болсын. Әрқашан сүйікті, әрі сыйлы болып, биік белестерді бағындыра беріңіздер! Көктемгі көңіл-күй серіктеріңіз болсын!
– Сұхбатыңызға рахмет!
Сұхбаттасқан
Гауһар ҚОЖАХМЕТОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!