Өткен аптада қалалық қоғамдық кеңестің кезекті отырысы өтті. Жиынға қала әкімінің орынбасары Арнұр Нұрмағанбетов арнайы қатысып, қоғамдық кеңес мүшелерімен бірге атқарылып жатқан жұмыстардың барысын саралады. Отырыстың күн тәртібіне енгізілген мәселелер кеңес мүшелерінің қызу талқысына түсті.
Кеңес отырысына төралқа мүшесі Салкадин Мырзабеков төрағалық етті. Алқалы жиынның маңыздылығын атап өткен қала әкімінің орынбасары Арнұр Әлібекұлы қоғамдық кеңестің халық пен билік арасындағы байланысты нығайтудағы орны ерекше екенін жеткізді.
– Құрметті кеңес мүшелері, әділетті әрі қуатты Қазақстанды құру жолындағы маңызды міндеттерді жүзеге асыруда сіздердің еңбектеріңіз айрықша. Жергілікті атқарушы билік өкілдерімен бірлесе отырып, ортақ мәселелерді оң шешуге мүмкіндік мол. Кеңес жұмысына табыс тілеймін, – деді қала әкімнің орынбасары.
Жиын барысында бес маңызды мәселе қаралды. Алдымен жол қауіпсіздігін қамтамасыз ету жайы назарға алынды. Бұл бағыттағы ахуал жөнінде кеңес мүшесі Эрик Теңізбаев баяндама жасап, көлік қозғалысының қауіпсіздігін арттыруға қатысты бірқатар ұсыныстарын ортаға салды.
Келесі мәселе – «Қарасора – 2025» атты арнайы жедел профилактикалық іс-шараға арналды. Бұл жөнінде қалалық полиция басқармасының есірткі қылмысына қарсы іс-қимыл бөлімшесінің жедел уәкілі, полиция капитаны Асылхан Абилакбаров ақпарат беріп, алдағы жоспарларымен бөлісті.
Сонымен қатар ҚР Мемлекеттік қызмет істері агенттігінің Қызылорда облысы бойынша департаментінің мемлекеттік қызмет көрсету басқармасының басшысы Нұржан Сүлейменов Қызылөзек және Ақжарма ауылдық округтерінде 2025 жылдың бірінші жартыжылдығында көрсетілген мемлекеттік қызметтердің мониторингі бойынша баяндама жасап, нақты деректерді ұсынды.
Келесі кезекте қалалық жұмыспен қамту және әлеуметтік бағдарламалар бөлімінің басшысы Кенжегүл Құрақбаева әлеуметтік қолдау шараларына қатысты мәслихат шешіміне енгізілетін өзгерістер жайында мәлімет берді. Ол мұқтаж азаматтарға көрсетілетін көмектің жаңа тәртібін және оның мөлшерлерін белгілеу мәселелерін түсіндірді.
Ал қалалық экономика және қаржы бөлімінің басшысы Гүлнар Баймаханова «2025–2027 жылдарға арналған қалалық бюджет туралы» мәслихат шешіміне өзгерістер енгізу жобасын таныстырды. Баяндамашының айтуынша, алдағы үш жылға арналған бюджет жоспарында әлеуметтік сала мен инфрақұрылымға басымдық берілмек.
Қоғамдық кеңестің кезекті отырысы осылайша бірқатар маңызды тақырыптарды қамтып, нақты ұсыныстар мен шешімдерді қабылдауға негіз болды. Кеңес мүшелері күн тәртібіндегі мәселелерді талқылап қана қоймай, оларды тиімді жүзеге асыруға қатысты ой-пікірін білдірді.
Айдана БАХТИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!