Ауыл жұртына демеу болған жоба

Мемлекет басшысы Қасым-Жомарт Тоқаев Қазақстан халқына кезекті Жолдауында ауыл кооперациясы аграрлық саланы дамытуға жол ашатынын айтқан еді. Соның аясында бүгінде ауыл-аймақтағы ауыл шаруашылығы саласын дамытуда «Ауыл аманаты» пилоттық жобасы жүзеге асырылуда.

Аталған жоба аясында биыл аймаққа 3 мил­лиард теңге қара­жат бөлінген. Жеңілде­тілген 2,5 пайызбен несие беру арқылы жылыжай, сүт, ет өндірісі, құс және балық шаруашылығы, өсім­дік шаруашылығын дамыту, ауыл шаруа­шылығы кооперативтерін жабдықтау, мал шаруашылығын дамыту және басқа да бизнес жобаларды қаржыландыру көз­делген.

Ауыл халқының табысын арттыруға негіз­делген несие 5 жылға, мал шаруашылығы үшін 7 жылға дейін беріледі. Ал мем­лекеттік бағдарлама игілігін тиім­ді пайдалана білгендер шаруа­шылығын дамытып, бүгінде оның жемісін көруде.

Өз шаруашылығын дамыту мақсатында «Ауыл аманаты» жобасына қа­тысқандардың бірі – Қарауылтөбе ауылдық округінің тұрғыны Сейсенкүл Кыдырбаева.  Ол жылыжай ісін жандандырмақ ниетте жобаға өтінім берген. Нәтижесінде кейіпкеріміз «Ауыл аманаты» бағдарламасы арқылы 7,9 миллион теңге жеңілдетілген несие алып, жаңа жылыжайды іске қосқан.

– «Ауыл аманаты» жобасы арқылы жеңіл­детілген несие алып, жылыжай ісін бастадым. Қазіргі таңда 255 шаршы метрді құрайтын жылыжайдан күніне 100 келіге дейін қияр жинаймын. Еңбек етемін деген адамға мем­лекет тарапынан берілер мүмкіндік көп. Тек істің көзін таба білу керек, еңбектену қажет, – дейді кейіпкеріміз бізбен әңгімесінде.

Соңғы жылдары қалада жы­лыжай ісі жанданып келеді. Істің көзін тапқандар мұ­ның тиімділігін де жақсы түсінген. Бүгінде кейіпкеріміз жылыжайдан алған қияр өнімімен ауыл және қала тұрғындарын қамтамасыз етіп келеді. Сонымен бірге жылы­жайда қызанақта өсірілуде. Кәсіпкер алдағы күз айларында қызанақтың алғашқы өнімдерін сатылымға шығармақ ниетте. 

Көкөністің бұл түрі қашанда дастарханнан табылатын, көп­шіліктің сұранысына ие өнім қатарында. Нарықты зерттей білген кейіпкеріміздің  кәсіп аясы мұнымен шектелмек емес. Ол алдағы уақытта жылыжайдан үздіксіз өнім алуды ойлап, лимон өсіруді де қолға алмақ.

Ауылда кәсіп ашып, өз ісін дамытқан Сейсенкүл Кыдырбаева жылыжайда 3 адамды тұрақты жұмыспен қамтып отыр.

А.ӘЛІМ

Жылдам ақпарат алу үшін Facebook, Instagram желілері мен Telegram каналымызға жазылыңыз!