l
Жадыраған жаз салтанат құрды. Жазғы демалысқа асыға шыққан мектеп оқушылары осы күндерді мағыналы өткізуге тырысады. Ауыл баласы – қалаға, қала баласы – ауылға асығатын кез дәл осы шақ. Оқудан босаған өрендердің кейбірі демалыс лагеріне барады.
Оқу-ағарту министрі Ғани Бейсембаевтың сөзіне сүйенсек, биыл 3,2 миллион оқушыны сауықтыру, демалыс және жұмыспен қамтудың түрлі бағдарламаларымен қамту жоспарлануда.
– Өңірлермен бірлесіп барлық демалыс орталығының тізімі бекітілді, олардың дайындығы республикалық штаб отырыстарында қаралды. Санитарлық нормалардың, тамақ қауіпсіздігі талаптарының, сондай-ақ судағы, ормандағы және спорт нысандарындағы қауіпсіздік ережелерінің сақталуына бақылау күшейтілді. Әлеуметтік осал санаттағы балаларға ерекше назар аударылуда. «Қазақстан халқына» қорының қолдауымен «Жаздық жолдама» жобасы аясында 10 мың бала тегін демалуға мүмкіндік алады. Басымдық көпбалалы отбасылар мен ауыл балаларына беріледі, – деді министр.
Айта кетейік, жазғы демалысты мазмұнды ұйымдастыру мақсатында министрлік 120 мың педагог-ұйымдастырушыны даярлады. Сондай-ақ қосымша 12 мыңнан астам студент пен ерікті тартылады екен.
Министрліктің ақпаратына сүйенсек, балалардың жазғы демалысын тиімді өткізу үшін еліміздегі театрлар мен мұражайларға кіру тегін болады.
55 млн 580 мың теңге қаражат қаралды
Қаладағы білім беру ұйымдары балғындардың демалыс кезеңін қызықты өткізу үшін барлық жағдай жасауда. Жыл өткен сайын оған айрықша көңіл бөлініп келеді. Соның дәлелі ретінде лагерьлерде демалатын оқушылар саны артқанын айтуға болады.
Қалалық білім бөлімінің деректеріне сүйенсек, маусым айынан бастап демалыс орындары балдырғандарға есігін айқара ашады. Жаз айында білім алушылардың 99,3 пайызын бос уақытын тиімді ұйымдастыру жоспарлануда. Оның ішінде мектеп жанынан 55 жазғы тынығу лагері жұмыс істеуде.
– Бүгінгі күні білім бөліміне қарасты білім беру ұйымдарының жанынан құрылған жазғы тынығу лагерьлерінде дайындық жұмыстары аяқталды. 2 маусымнан бастап балаларды қабылдауға дайын. Балалар 5 санат бойынша қамтылады. Атап айтқанда, мемлекеттік атаулы әлеуметтік көмек алуға құқығы бар отбасылардан шыққан балалар, мемлекеттік атаулы әлеуметтік көмек алмайтын, жан басына шаққандағы табысы ең төмен күнкөріс деңгейінің шамасынан төмен отбасылардан шыққан балалар, жетім және ата-анасының қамқорлығынсыз қалған балалар, төтенше жағдайлардың салдарынан шұғыл жәрдемді талап ететін отбасылардан шыққан балалар, білім беру ұйымының алқалы басқару органы айқындайтын білім алушылар мен тәрбиеленушілердің өзге де санаттарына қаржылай және материалдық көмек көрсетуге бөлінетін қаражатты қалыптастыру, жұмсау бағыты мен есепке алу тәртібін айқындайды. Бұл мақсатқа бюджеттен 55 млн 580 мың теңге қаражат қаралды, – деді қалалық білім бөлімінің әдіскері Нұрқанат Амантаев.
Жазғы мектеп қызығы
26 мамырдан бастап қаладағы мектептерде жазғы тынығу лагері жұмыс істеуде. Біз жазғы мектептің қызығын балалармен бірге сезіну үшін арнайы С.Сейфуллин атындағы №4 ІТ мектеп-лицейге арнайы бардық. Мұнда бір мезетте 125 бала тынығуда. 1-6 сынып оқушылары түрлі үйірмелерге қатысып, уақыт қызық өтуде. Мектеп директорының оқу ісі жөніндегі орынбасары, лагерь жетекшісі Сұлушаш Алмасбекованың айтуынша, білім ордасы қазіргі уақытта жас өрендердің шаттыққа толы орнына айналған. Мұнда бүлдіршіндер үшін қызықты күндер өтуде.
– Жазғы лагерь ашылған күннен бастап демалысты мазмұнды өткізу үшін тиісті үйірмелер бойынша балаларға көңіл бөлінуде. Олардың әрбір минуты тиімді өткені біз үшін маңызды. Лагерьдің ашылу салтанатына мектебіміздің түлектері үлкен демеушілік жасады. Атап айтсақ, «Асар» ЖШС директоры Жасұлан Тасыбаев балаларға тегін балмұздақ таратты. «ШиК» жарнама агенттігінің директоры Шыңғысхан Данияр лагерьдің көрнекілігіне демеушілік жасап отыр. Тынығу лагері өз жұмысын заманауи бағытта жандандырып отыр. Мектепте оқушылардың тынығуына барынша қолайлы мүмкіндік бар. «Шабыт шуағы», «Сахна жұлдызы», «Ой мен есеп алаңы», «Шебер қолдар» және ағылшын үйірмелері оқушыларды қызықтыра түседі, – дейді Сұлушаш Алмасбекова.
– Жазғы демалысым қызықты өтуде. Бізге барлық жағдай жасалған. Түрлі үйірмелерге қатысып, көңіліміз көтерілуде. Барлық іс-шараларға белсене қатысудамын. «Шебер қолдар» үйірмесі арқылы сурет салуды, тігін тігуді үйретеді. Сондай-ақ «Сахна жұлдызы» үйірмесі мені қатты қызықтырды. Бұл мені арманыма жетуге жетелейді. Түрлі қойылымды қойып дайындайды. Бұл мен үшін үлкен сахнаға дайындық деп есептеймін. Өзімді еркін сезінуді үйрендім. Сахна жұлдызы болу менің болашақтағы арманым десем де болады, – дейді 4 сынып оқушысы Жазира Жарасбекқызы.
Ал 4 сынып оқушысы Жанарыс Мұхамедқали ағылшын, шахмат үйірмелеріне белсене қатысып жүргенін айтты.
– Маған жазғы мектеп лагері өте қатты ұнауда. Шахматты тереңірек үйренудемін. Мұнда түрлі тақырыптарда сайыс өткізіледі. Жазғы демалысты тиімді өткізгім келгендіктен лагерьге қатысуды жөн көрдім. Жадыраған жаздың рахатына бөленіп, балдәурен шақтың бал дәмін ұмытпастай етіп өткізуді ұйымдастырған мектебіме рахмет айтамын, – деді ол.
Жаңа жобалар жүзеге асады
Қала сыртында орналасқан 2 лагерь мен орталықтарда 4 ауысымда 1888 бала демалыспен қамтылады. Одан бөлек, «Қазақстан халқына» қорының демеушілігімен Түркістан облысы, Төле би ауданы, Біркөлік елді мекеніндегі «Қуаныш» лагерінде 200 оқушы, демеушілер мен кәсіподақтар есебінен жобамен 200-ден аса оқушы тынығады.
Сондай-ақ 9 мектеп жанында этнолагерьлер, 18 шатырлы лагерьлер жұмыс істеп, онда 788 бала қамтылды.
Қызылорда қалалық білім бөлімінің әдіскері Нұрқанат Амантаевтің айтуынша, биыл балалардың бос уақытын ұйымдастырудағы бір ерекшелік, жұмысшы мамандықтары жылына орай «Жас Sкills» жобасы жүзеге асуда. Білім беру ұйымдарының 8-10 сынып оқушыларын өңірдегі 18 колледждің материалдық-техникалық базасымен таныстыру, жұмысшы құзіреттілігі туралы жан-жақты кәсіби бағдар беру, олардың қызығушылығын арттыру бағытында шаралар қабылданады.
– Мектеп, колледждерден бөлек, облыс аумағындағы қосымша білім беру ұйымдарында да жазғы лагерьлер жұмыс істейді. Биыл да жазғы демалыс кезеңінде балалардың қауіпсіздігін қамтамасыз ету және бос уақыттын тиімді ұйымдастыру бағытындағы жұмыстарды өз деңгейінде үйлестіреміз, – деді білім бөлімінің әдіскері.
Лагерьлердің жағдайы қатаң бақылауда
Енді жазғы демалыс лагерьлерінің санитарлық-эпидемиологиялық жағдайына шағым болса, жедел желіге қоңырау шалуға болады.
Денсаулық сақтау министрлігінің санитариялық-эпидемиологиялық бақылау комитетінің мәліметінше, биыл балаларды сауықтыру ұйымдарын маусымға уақытылы дайындау мақсатында комитеттің аумақтық бөлімшелері әкімдікпен бірлесіп, балалардың жазғы демалысын ұйымдастыру бойынша «Жол картасын» әзірлеп бекітті. Жол картасын іске асыру шеңберінде балалар демалысы нысандарының санитарлық-техникалық жай-күйін бағалау жөніндегі ведомствоаралық комиссиялардың жұмысын ұйымдастыру, лагерь қызметкерлерімен оқыту және түсіндіру іс-шараларын өткізу, сондай-ақ дайындықтан бастап ауысым аяқталғанға дейінгі барлық кезеңдерде санитарлық-эпидемиологиялық талаптардың орындалуын бақылау, балалардың тамақтану, сумен жабдықтау, медициналық қызмет көрсету және тұру жағдайларының сапасын бақылау көзделуде. Қазіргі кезге дейін консультациялық көмек көрсету үшін әр лагерьге санитарлық-эпидемиологиялық қызмет мамандары бекітілген. Олар 191 лагерь өкілдеріне кеңес берді.
ТҮЙІН. Жазғы лагерь баланың өзін-өзі дамытып, алаңсыз демалуына жағдай жасайды. Мұндағы әрбір бала түрлі шараларға қатысып, ой-өрісін дамытып, талай танымдық дүниелермен танысады. Сондықтан да балалар үшін жақсы демалыс ұйымдастыру – бүгінгі күннің басты міндеті. Ал демалыстың мәнді өтуі – білімге деген құлшыныстың бастауы екені сөзсіз.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!