Қалалық жастар ресурстық орталығы қолға алған әлеуметтік жобалар мен түрлі бағыттағы бағдарламалар бүгінде жас ұрпақтың әлеуетін арттыруға, олардың қоғам өміріне белсене араласуына орасан зор пайдасын тигізіп отыр. Мәселен, қазіргі таңда Қызылордада 362 мың 279 тұрғын болса, оның 14 пен 35 жас аралығындағылар 103102-ні құрайды. Ал ауылдық аймақтардағы жас буын өкілдерінің саны 12499 құрайды. Бұл қала халқының 28,5 пайызын ғана көрсетеді. Жастардың бос уақытын тиімді өткізуіне жағдай жасау, олардың шығармашылық және азаматтық белсенділігін арттыру бүгінгі күннің басты бағыттарының бірі болмақ. Осы тұрғыда «Qosyl» жастар ресурстық орталығы жүйелі әрі нәтижелі жұмыстар жүргізіп келеді. Орталық жанынан жастарға арналған үйірмелер мен бастамашыл топтар құрылып, жастарды кәсіпкерлікке, волонтерлік қызметке, мәдени және қоғамдық өмірге тарту бағытында ауқымды жобалар атқарылып келеді. Сонымен қатар еріктілер қозғалысын дамыту, жаңа идеяларды қолдау және жас кәсіпкерлерге бағыт-бағдар беру – орталықтың негізгі міндеттерінің бірі. «Qosyl» жастар ресурстық орталығының бастамалары арқылы көптеген жас өз қабілетін танытып ғана қоймай, кәсіби тұрғыда шыңдалуға мүмкіндік алуда. Осындай жобалардың арқасында қызылордалық жастар ел дамуына өз үлесін қосып, белсенді азаматтық ұстанымын қалыптастыруда. Осы орайда «Qosyl» ресурстық жастар орталығының атқарып жатқан жұмысына шолу жасадық.
Қазіргі таңда қала бойынша 17 техникалық және кәсіптік білім беру мекемесінде 17 мыңнан астам студент білім алуда. Ал Қорқыт ата атындағы Қызылорда университеті, «Болашақ» университеті мен Қызылорда ашық университетінде 15 мыңнан аса студент оқиды. Бұл – жастардың білімге деген ұмтылысының айқын дәлелі. «Qosyl» жастар ресурстық орталығының директоры Медет Жорабектің айтуынша, биыл жастардың белсенділігін арттыру мақсатында арнайы 8 әлеуметтік жоба жүзеге асқан. Бұл жастардың бос уақытын үнемдеп ғана қоймай, жастарға бағыт-бағдар беріп, тиімді жобамен айналысуына мол мүмкіндік беретінін айтты.
– Мемлекеттік жастар саясатын дамыту мақсатында 19 миллион 381 мың теңге бөлініп, бірқатар әлеуметтік жобалар іске асырылуда. Атап айтқанда, «Жұмысшы мамандықтарды насихаттау», «Ауыл жастарына қолдау көрсету», «Жастар орталығы – жастар үшін мүмкіндік алаңы», «Патриоттық сана мен отбасы құндылықтарын дәріптеу», «NEET және қылмысқа бейім жастарды әлеуметтендіру», «Волонтерлік қозғалысты дамыту», «Qyzylorda Youth Fest» фестивалі және «Qosyl Premya» жастар марапаты бар. Бұл жобалар жастардың бос уақытын тиімді өткізуге, дұрыс бағыт-бағдар алуға тиімді мүмкіндік береді. Бастысы, жастармен бір толқында болып, жас буынның талғамына сай болу, – дейді Медет Ерданаұлы.
МҮМКІНДІК АЛАҢЫНА АЙНАЛҒАН ОРТАЛЫҚ
Қызылордалық жастар үшін «Qosyl» орталығы бүгінде нағыз мүмкіндік алаңына, қолайлы ортаға айналған. Мұнда би залы, спорт секциялары, фото-видео студия, коворкинг аймағы, Wi-Fi және демалыс аймағы бар. 2025 жылдың алғашқы тоғыз айында орталық қызметін 4168 жас пайдаланған. Ал қаңтар мен тамыз айлары аралығында 141 іс-шара өткізіліп, оған 6150 жас қатысқан. Сондай-ақ онлайн және офлайн форматта кеңес алғандар саны 1980 құрайды. Орталық қызметкерлері жастарға офлайн форматтан бөлек, онлайн түрде де көмек көрсетуге әрдайым дайын екенін мәлімдейді. Қала аумағында 30-ға жуық жастар ұйымы тіркелген болса, оның 10-ға жуығы белсенді жұмыс атқаруда. Олардың қатарында «AMANAT» партиясы жанындағы «Жастар рухы», «Қызылорда студенттер альянсы», КВН одағы және өзге де ұйымдар бар. Ұйымдардың мақсаты бір. Жастарға заман талабына сай жайлы орта қалыптастырып ғана қоймай, тың дүниелерді өмірге әкелу.
– Жастар шығармашылығын дамыту бағытында биыл Біріккен Ұлттар Ұйымының даму бағдарламасы шеңберінде «Қызық орда» қоғамдық қорымен бірлесе отырып, «Creative» студиясын аштық. Бұл – жаңа буынның тың ойы мен ізденісінің нәтижесінде жүзеге асқан жоба. Ал тың идея дүниеге келу үшін ең алдымен жастарға қолайлы орта қалыптастыруымыз қажет, – дейді Медет Жорабек.
Жұмыссыз жастар – қоғамның басты назарында. Қалада жұмыссыз ретінде 2629 жас тіркелген. Оның 874-і тұрақты жұмысқа орналастырылса, 1700-ге жуығы «Қоғамдық жұмыс» және «Жастар практикасы» бағдарламалары арқылы еңбекке тартылған. Осы орайда жұмыссыз жастар үшін «Мүмкіндіктер алаңы» бос жұмыс орындары жәрмеңкесі жүзеге асуда. Нәтижесінде жыл басынан бері бұл ауқымды жоба 8 рет өткізіліп, 23 жас тұрақты қызметке жолдама алған.
«Qosyl» жастар ресурстық орталығы қала тыныштығын да естен шығармайды. Қала жастарының тәртібі мен қауіпсіздігін қамтамасыз ету – қоғамның ортақ жауапкершілігі деседі. Бұл бағытта жүйелі жұмыстар атқарылып, алдын алу шаралары жүзеге асуда.
– Құқық бұзушылықтың алдын алу мақсатында жыл басынан бері 22 рет түнгі рейд ұйымдастырылды. Сонымен қатар жасөспірімдер арасында ерте жүктіліктің, тұрмыстық зорлық-зомбылықтың және буллингтің алдын алу бойынша 29 кездесу өткізілді. Нәтижесінде 2207 жасқа түсіндірме жұмысы жүргізілді. Бұдан бөлек, жастар арасында сыбайлас жемқорлықтың алдын алу бағытында да тұрақты кездесу ұйымдастырылып келеді. Ең маңыздысы қала тыныштығы, – дейді «Qosyl» жастар ресурстық орталығының директоры Медет Ерданаұлы.
«NEET» ЖӘНЕ «МАРГИНАЛ» ЖАСТАРМЕН ЖҰМЫС
Қоғам дамуының бір өлшемі – жастардың белсенділігі мен әлеуеті. Осы орайда, «NEET және маргинал жастармен жұмыс жөніндегі жол картасы» аясында бірқатар шаралар жүзеге асып келеді. Аталған бағыт бойынша биыл екі мәрте жұмысшы топтың отырысы өткізіліп, нақты іс-шара жоспары бекітілген. Сонымен қатар жастардың әлеуметтік бейімделуіне бағытталған «Көшпелі кеңес» пен «Мүмкіндіктер алаңы» жобалары тұрақты түрде жұмыс істеуде. Биыл алғаш рет «NEET санатындағы және қылмысқа бейім жастарды әлеуметтендіру» жобасы қолға алынды.
– Бұл жоба аясында тренингтер, экскурсиялар және футбол турнирлері ұйымдастырылуда. Сондай-ақ «Жастар. Тәртіп. Құндылық» атты кездесуге 300-ге жуық оқушы мен студент қамтылмақ. NEET санатындағылар – оқу мен еңбекке қызығушылығы төмен, қоғамнан өз орнын таба алмаған жас буын өкілдері. Бұл – қоғам үшін маңызды әрі күрделі мәселе. Мұндай жайтқа бейжай қарауға болмайды. Жастардың неғұрлым бос уақыты көп болған сайын, қоғамға зияны тиетіні анық. Бұл мәселе ушықпай тұрып, дер кезінде қолға алу керек, – дейді Медет Жорабек.
ЖАСТАР ҚАНДАЙ МАМАНДЫҚҚА ҚЫЗЫҒАДЫ?
Президент Қасым-Жомарт Тоқаевтың бастамасымен 2025 жыл – «Жұмысшы мамандықтары жылы» болып жарияланды. Осыған орай Қызылорда қаласында «Jastar X» диалог алаңы құрылып, «Жас дәнекерлеуші», «Жас құрылысшы», «Жас тігінші» сияқты сайыстар өткізілді. Алдағы уақытта бұл бастама электриктер мен құрылысшылар арасында жалғасын таппақ. Сонымен бірге «Тазалық патрулі» волонтерлік жобасы да өз жалғасын тауып келеді. Тамыз айында өткен экологиялық акцияға жүзге жуық ерікті қатысып, қала аумағында тазалық шараларын жүргізді.
– Қазіргі таңда жастар арасында «Жұмысшы мамандықтарға» сұраныс аз. Себебі қазір жастар оңай жұмысқа ұмтылады. Тез танымал болу, жайлы кабинетте отыру жастар үшін абыройлы жұмыс деп санайды. Ал нағыз еңбекті, қажет мамандықты көзіне де ілмейді. Сондықтан жұмысшы мамандықтарды насихаттау біздің басты міндетіміз, – дейді ол.
Негізгі бағыттың бірі – ауыл жастарын қолдау. Жастар саясатын жүзеге асыру бағытында ауылдық жерлерге де айрықша көңіл бөлініп келеді. Биыл «Ауыл жастарына қолдау көрсету және әлеуметтендіру» әлеуметтік жобасы аясында 5 ауылдық округте 20-ға жуық түрлі форматтағы іс-шаралар ұйымдастырылды. Бір айға жоспарланған бұл игі бастама қазан айынан өз жұмысын бастады. Жобаның басты мақсаты – ауыл жастарының белсенділігін арттырып, олардың қоғам өміріне бейімделуіне және қабілетін дамытуға мүмкіндік жасау. Әлеуметтік қызмет барысында жастарды әлеуметтендіру, шығармашылық және спорттық бағыттағы жобаларды жүзеге асыру, сондай-ақ ауылдық елді мекендердегі жастар бастамаларына қолдау көрсету көзделген.
– Қала жастарынан бөлек, ауыл жастарымен де жүйелі түрде жұмыс істейміз. Біз ауыл, қала деп бөлген емеспіз. Бастысы, ынта, ниет болса болғаны. Ауыл жастарының да бастамаларына қолдау білдіріп, көмектесуге әрдайым дайынбыз, – дейді Медет Ерданаұлы.
Биыл халықаралық жастар күніне орай дәстүрлі түрде «Qyzylorda Youth Fest» мәдени-көпшілік шаралары өтті. Бұл фестиваль 8-11 тамыз аралығында өтіп, бірнеше бағыттағы мазмұнды іс-шараларды қамтыды. Фестиваль 8 тамыз күні «Табиғатты сақта – болашақты қорға» атты экологиялық акциямен басталды. Қаланың түкпір-түкпірінен жиналған 100-ге жуық жас 10 топқа бөлініп, белгіленген аумақтарда тазалық жұмыстарын жүргізді. Бір сағат ішінде қатысушылар 1 тоннадан астам қоқыс жинады. Нәтижесінде 250 қап қалдық шығарылып, ең белсенді топтар арнайы бағалау критерийлері бойынша марапатталды. Келесі күні, заманауи би топтары мен дара бишілер арасында «Qyzylorda Youth Fest» аясында байқау ұйымдастырылды. 8 команда өз өнерлерін ортаға салып, көрермен көңілінен шықты. Жеңімпаздар қорытынды кеште дипломдармен және ақшалай сыйлықтармен марапатталды. Кезекті іс-шаралар легі «Адамзаттың Абайы» атты онлайн челленджімен жалғасты. Жастар әлеуметтік желілерде ұлы ақынның өлеңдері мен нақыл сөздерін оқып, бейнежазбалар жариялады. Бұл жастардың рухани тәрбиесін күшейтіп ғана қоймай, Абай мұрасына деген қызығушылығын арттырды. Фестиваль аясында Ғани Мұратбаевтың ескерткішіне тағзым ету рәсімі өтті. Жастар қоғам қайраткерінің өнегелі өмір жолына құрмет көрсетіп, оның ел игілігі жолындағы еңбегін еске алды. Жыл қорытындысында дәстүрге айналған «Qosyl Premya» атты жастарды марапаттау рәсімі өтеді. Бұл – мәдениет, спорт, журналистика, білім және қоғамдық қызмет салаларында жетістікке жеткен жастарды ынталандыруға бағытталған жоба. Марапаттау кешіне жыл бойы белсенділік танытып, өз саласында табысты еңбек еткен жастар қатысады.
– Қазіргі таңда жастардың әлеуетін арттыруға бағытталған жобалар жүйелі түрде өз жалғасын табуда. Мұнымен іс-шаралар легі аяқталмайды. Әрмен қарай өз жалғасын таппақ. Біздің «Qosyl» жастар ресурстық орталығының бастамалары осының айқын көрінісі. Жастардың идеясы мен арманына қолдау көрсету – ел болашағына салынған инвестиция. Өйткені жастарды тәрбиелеу мен олардың дамуына жағдай жасау – тек отбасының ғана емес, тұтас қоғамның ортақ міндеті, – дейді Медет Жорабек.
Айдана БАХТИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!