Кішкентай Дәуреннің қолынан жетектеген анасы вокзалға қарай бет алды. Пойыз уақытын қайта-қайта қарап, қалып қоймайық деген ниетпен баласына тез-тез деп қояды. Сол-ақ екен, Дәуреннің құлағына алыстан пойыз доңғалағының тарс-тұрс еткен дыбысы естілді. Жақындаған сайын әлгі дыбыс құдды сиқырлы әуендей сыңғырлады. Пойыз доңғалағын балғамен ұрған ағайдың әр қимылына қалт жібермей қарап тұрған оған бұл әрекет қызық көрінді. Әрбір вагонның доңғалағын ұқыптылықпен қарап, пойыз қауіпсіздігіне жауап беретін мамандық иесін жолаушылар көріп жүрсе де бұл мамандықтың қыр сырын біле бермейтіні анық еді. Сол кезде Дәурен анасынан:
– Апа, бұл ағалар кім, неге балғамен ұрады? – деп сұрады.
– Біздің Алматыға аман жетуіміз осы ағалардың еңбегі. Пойыздың діттеген жерге қауіпсіз жетуі үшін қаншама тексеруден өтеді, – деді анасы.
Пойызға мінген адамның бәрі станция сайын дөңгелекті ұрғылаған жұмысшыларды байқайды. Алайда оның нендей қызмет атқаратынын сұрауға қысылатындар да бар. Көбіне қызық көрінген бұл қызмет түрінің не мәні барын сұрауға теміржол вокзалына бет алдық. 16 жылдан бері осы мамандықтың нанын жеп жүрген Әнуарбек Құттымырзаұлымен сұхбаттасудың сәті де түсті. Бес бала тәрбиелеп отырған одан мамандығының маңызын, жұмысының қыр-сырын сұрадық.
– Біздің жұмыста ең бастысы – дауысты жазбай тани білу. Күннің ыстығы мен суығына қарамай вагон дөңгелектерін жөндеу. Қызметім вагон қараушы, жөндеуші деп аталады. Аса қауіпті ақаулар болмаса дәл мезетінде өзіміз жөндеп кете береміз. Ал егер ақауды жөндеу сол арада мүмкін болмаса пойызды тоқтатуға шешім қабылдаймыз, – дейді ол.
Қолындағы балғамен ұрған кезде шығатын дыбыс жөндеу процесінде үлкен рөл атқарады. Егер үлкен доңғалағынан күңгірт дыбыс шықса, демек, жарылды деп түсінуге болады. Сонымен бірге доңғалақтың сыртқы бөлігіндегі қақпағынан күмәнді дыбыс шықса да ақау белгісі бар екенін білдіреді. Жөндеушілер вагонның тежегіш ақауын анықтау керек. Әнуарбек Өмірзақ өткен жылдың қараша айында вагон тексеру кезінде доңғалақ бекітулі қаңқасынан 70 мм болатын сынықты анықтаған. Дәнекер жігінен жарылған ақауды анықтаған оған «Қазақстан темір жолы – Жүк тасымалы ЖШС» ЖТ Қызылорда бөлімшесі» филиалы басшылығы арнайы алғыс хатпен марапаттапты. Бұл жұмысына адал сенген маманға берілген баға.
– Күніне 25 шақырым жаяу жүріп, жолаушылардың қауіпсіздігін қамтамасыз етуді азаматтық борышым санаймын. Күніне 3000-нан астам вагон доңғалағын тексеріп, ақауды анықтап, дер кезінде жөндейміз, – дейді вагон қараушы Әнуарбек Өмірзақ.
Қолындағы балғасымен вагон доңғалақтарын тексеріп жүрген Әнуарбек кішкентай Дәуреннің бала арманын қалыптасуына әсер еткендей болды.
– Анашым, мен де өскенде жолаушылар қауіпсіз жетуі үшін вагон қараушы болғым келеді, – деп күлімсіреді.
Думан КЕҢШІЛІК,
Суретті түсірген Нұрболат НҰРЖАУБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!