Ұлттық мереке – Республика күні қарсаңында Мемлекет басшысы бірқатар азаматтарды Елорда төрінде ел дамуы жолында елеулі еңбегі үшін марапаттады. Құрмет төрінен көрінгендердің қатарында облыс әкімі Нұрлыбек Машбекұлы да бар. Аймақ басшысының ІІІ дәрежелі Барыс орденін иеленуін барша Сыр жұрты қуана қабылдады. Соңғы кездері Сыр өңіріндегі серпінді істер, халықтың сапалы өмір сүруі үшін атқарылып жатқан игі істердің барлығы халықтың көз алдында. Қай салада болсын, республикада көш басында көрініп келе жатқан өңірде атап айтар жетістіктер аз емес. Ең бастысы, елдің еңсесі биік, келер күннен күтері де аз емес. Сырбойылықтардың мерейін өсірген бұл марапат қажырлы еңбек пен талаптың, береке мен бірліктің нәтижесі екен даусыз. Елордадан басталған мерекелік көңіл-күй Сыр өңірінде де жалғасын тапты.
Кеше Өнер орталығында облыс әкімі Нұрлыбек Нәлібаевтың қатысуымен Республика күніне арналған салтанатты шара өтті. Оған құқық қорғау органдарының, басқарма, департаменттердің басшылары, зиялы қауым өкілдері мен облыстық мәслихат депутаттары қатысты.
Аймақ басшысы жиналған қауымды ұлттық мереке – Республика күнімен құттықтап, өңірдің әлеуметтік-экономикалық дамуындағы жетістіктерге тоқталды.
– Баршаңызды еліміздің ең басты ұлттық мерекесі – Республика күнімен шын жүректен құттықтаймын! Ұлтымыз ұлықтаған атаулы күнді Сыр өңірі толағай табыстармен қарсы алуда. Президентіміз Қасым-Жомарт Кемелұлы бірлік пен берекенің, өнер мен мәдениеттің құтты ұясы – Сыр өңіріне келген сапарында облысымызға дамудың үлкен перспективалары бар стратегиялық маңызды аймақ деп оң бағасын берді.
Бүгінде Президентіміздің, Үкіметтің ерекше қолдауының арқасында облыс бюджеті 744 млрд теңгеден асты. Екі жыл бұрын 364 млрд теңге болатын.
Аймақта 43 млрд теңгеге 300 шақырымға жуық автомобиль жолдары мен көпір өткелдері жөнделуде. Соңғы үш жылда жөнделген жол 1271 шақырымға жетті. Осылайша жақсы жағдайдағы жолдардың үлесі 92 пайыздан асады.
Электр энергиясымен қамту бағытында 2022 жылдан бері 18 млрд теңгеге 70 жоба іске қосылды. Биылдың өзінде 11 млрд теңгеге 38 жоба қолға алынды. Бұл тозған желілерді 72-ден 62 пайызға төмендетеді. Облыста 30 млрд теңгеге 11 елдімекен (Сексеуіл және Төретам кенті, Абай, Ақсу, Шәменов, Сейфуллин, Тоқмағанбетов, Алмалы, Досбол Датқа, Бестам, Төменарық ауылдары) газдандырылуда. Осы жұмыстар аяқталғанда өңірді газбен қамту көрсеткішін 75-тен 78 пайызға жеткіземіз.
Елді мекендерді сапалы ауызсумен қамтуда 2022 жылдан бері 16 млрд 800 млн теңгенің 55 жобасы жүзеге асты. Жыл соңына дейін көрсеткіш 98,1-ден 98,6 пайызға артады. Келесі жылдың соңында облыстағы барлық елді мекенге орталықтандырылған ауызсу қосамыз.
Егемендікке қол жеткізуді аңсап, өмірін күреспен өткізген ата-бабаларымыздың асыл арманы Тәуелсіздігімізді баянды ету – бүгінгі ұрпақ үшін жауапкершілігі зор міндет. Баршаңызды Республика күнімен тағы да құттықтап, отбасыларыңызға амандық, бақ-береке, толайым табыстар тілеймін! Еліміздің өркендеуі жолындағы адал қызметтеріңіз табысты, еліміз еңселі, Тәуелсіздігіміз тұғырлы болғай!», – деді аймақ басшысы Н.Нәлібаев.
Мемлекеттік қолдау мен ұлттық жобалар шеңберінде қаржыландырудың барлық көзінен биыл 863 900 шаршы метр тұрғын үй пайдалануға беріледі. 2022-2023 жылдары 4 мыңға жуық пәтер табысталып, 17 мың тұрғын баспаналы болды.
«Болат Өтемұратов қорының» демеушілігімен Қорқыт ата әуежайының жаңа терминалы салынды. Жерлестеріміз үшін бұл – өте маңызды жоба. Жақын арада ел игілігіне табысталады. Қуаттылығы 240 мегаваттық жаңа жылу-электр орталығының құрылысы қарқынды жүруде. Нысан келесі жылы қыркүйек айында пайдалануға беріледі. Қызылорда қаласын ыстық сумен қамту жобасы оң шешімін тапты. Яғни 623 көпқабатты тұрғын үйге ыстық су қосылады.
Салтанатты жиында өңірдің дамуына өз еңбегімен үлес қосып жүрген бірқатар азаматтар марапатталды. Атап айтқанда, еңбек ардагері Жарылқасын Шәріпов ІІ дәрежелі «Барыс» орденімен марапатталса, 7 азаматқа «Парасат», 15 азаматқа «Құрмет» ордені, 22 азаматқа «Ерен еңбегі үшін», 2 азаматқа «Шапағат» медалі мен «Қазақстаның еңбек сіңірген қайраткері» құрметті атағы берілді. Құрметке ие болғандардың қатарында сырбойылық журналистер де бар. Еселі еңбегімен қазақ журналистикасының дамуына үлес қосқан белгілі тележурналист Айткүл Шалғынбаева, «Егемен Қазақстан» газетінің Қызылорда облысындағы меншікті тілшісі Мұрат Жетпісбаев ардагер-журналист «Ерен еңбегі үшін» медалімен марапатталды.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!