Елімізде 2025 жыл «Жұмысшы мамандықтар жылы» деп жарияланды. Бұл бастама жұмысшы мамандықтарының маңыздылығын арттыруға, жастарды осы салаға тартуға бағытталған. Қаламызда жұмысшы мамандықтарын насихаттап, еңбек ардагерлерінің өнегелі өмір жолын жастарға үлгі етуде ауқымды шаралар ұйымдастырылуда. Осы мақсатта Ә. Тәжібаев атындағы Қызылорда облыстық әмбебап ғылыми кітапханасында Еңбек күніне орай «Адал еңбек – жетістіктің бастауы» атты еңбек ардагерлерімен кездесу ұйымдастырылды.
Шарада болашақ ІТ мамандары, аспазшы, кондитер және тігінші мамандығы бойынша білім алып жатқан студенттер өз қолдарынан жасаған өнімдерін көпшілік назарына ұсынды.
– Сіздерді осындай жиында көргеніме қуаныштымын. Себебі жұмысшы мамандықтары – жай ғана мамандықтар емес, нағыз еңбекті, төзімділікті талап ететін салалар. Тіпті олардың орнын цифрлы дәуірде ешқандай технология алмастыра алмайды. 2025 жылды Мемлекет басшысы «Жұмысшы мамандықтар жылы» деп жарияласа, біз жастарға қолдау білдіруге дайынбыз. Қазіргі таңда қоғамға аспазшы, наубайшы, қасапшы сынды жұмысшы мамандары қашанда қажет. Сондықтан біз сіздерді жұмысқа алып, қолдау көрсетуге әзірміз, – деді «Best Service LTD» ЖШС директорының орынбасары В.Сүгірбаева.
Бүгінгі шарада колледж студенттері көрерменге шеберлік сағаттарын ұсынды. Жас ІТ мамандары көпшілікке өз жобаларын көрсетсе, тігінші мамандығында оқитын студенттер этно-стильдегі киім үлгілерін сән дефилесінде паш етті.
– Биыл баршамызға мәлім «Жұмысшы мамандықтар жылы». Бұл қатарға тігінші мамандығы да кіреді. Тігін – шабыт пен талғамның тоғысы. Әрбір жан тігінші бола алмайды әрине, себебі ол туа біткен талантты қажет етеді. Сондықтан осы мамандықты игеріп жүрген студенттерге айтарым – сәнге сұраныс ешқашан азаймайды. Сұлулыққа дем беретін тігін өнері ешқашан өлмейді, – деді «Гаухар» ательесінің директоры Қ.Мұсаймова.
Аспаз мамандығында оқитын студенттер де өз өнерлерін көрсетіп, тағам дайындау барысында тәжірибелерімен бөлісті. Жиында студенттер бір-бірімен тәжірибе алмасып қана қоймай, жұмысшы мамандықтарының қоғам үшін маңызын айқындай түсті. Бүгінде көпшілігі тек кеңседе жұмыс істеуді армандайды. Ал шын мәнінде қоғамға жұмысшы мамандықтары ауадай қажет. Бұл шара еңбектің қадірін түсінуге септігін тигізді.
Шара соңында көрермен назарына «Тіршілік негізі – еңбек» атты кітап көрмесі ұсынылды.
Айдана БАХТИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!