Осы аптада А.Тоқмағамбетов атындағы мәдениет үйінде «Еңбек мерейі – ел құрметі» тақырыбында салтанатты кеш өтті. Түрлі сала қызметкерлерін марапаттау салтанатына қала әкімі Нұржан Ахатов қатысып, Мемлекет басшысының Сыр өңіріне жұмыс сапарындағы іс-шараны ұйымдастыруға және «Таза Қазақстан» республикалық экологиялық акциясына белсенді атсалысқан азаматтарға облыс әкімі Нұрлыбек Нәлібаевтың алғысын жеткізді.
– Өткен аптада Мемлекет басшысы Қасым-Жомарт Кемелұлы өңірімізге жұмыс сапарымен келіп, ел игілігіне бағытталған ірі инвестициялық, инфрақұрылымдық және өндірістік жобалардың жүзеге асырылу барысымен танысты. Қала көшелері мен даңғылдарының аясы кеңейіп, жол-көлік инфрақұрылымында серпінді жұмыстар жүзеге асты. Көпірлер күрделі жөндеуден өтіп, жаңа өткелдер салынды. Аймақ басшысының ұтымды үйлестіруімен, демеушілердің көмегімен барлығы 55 млрд теңгеден астам қаржыға жаңа жобалар жүзеге асуда.
Бүгінде ел Президентінің бастамасымен қолға алынған «Таза Қазақстан» республикалық акциясы аясында облыс орталығының озық сәулеттік үлгісі қалыптасып, халықтың экологиялық мәдениеті, тазалыққа, ең бастысы, тәртіпке деген жауапкершілігі артты.
Қызылорда – еліміздегі ең таза қалалар қатарына қосылды. Жаңадан саябақ, сквер, аллеялар соңғы үлгіде абаттандырылып, жаңғыртудан өтуде.
Соның бірі әрі бірегейі Тұңғыш Президент саябағындағы ілкімді істер.
Ел Президенті облыс әкімі Нұрлыбек Машбекұлының аймақтың әлеуметтік-экономикалық дамуы мен мәдени-рухани өрлеуінің мол мүмкіндігін ашқан қажырлы қызметіне, Сыр еліндегі байыпты бастамаларға жоғары бағасын берді. Облыстың жарқын болашағына сенім білдірді.
Өз кезегінде аймақ басшысы да Қызылорда облысының өсіп-өркендеуіне, халқымыздың әл-ауқатының артуына атсалысқан, ортақ іске жұмыла білген азаматтарды лайықты бағалады. Бұл еңбекке деген мәртебелі құрмет.
Бүгінгі арнайы шарада Нұрлыбек Машбекұлы сіздерге ыстық ықыласын арнап, облыстың ең жоғары марапаты – Құрмет грамотасымен Алғыс хаттарын табыстауды тапсырды, – деді Нұржан Сәбитұлы.
Айта кету керек, соңғы жылдары аймақ басшысының қолдауымен және тың бастамаларымен Сыр шаһары қарқынды дамып келеді. Қала бюджеті еселеп артып, халыққа ең қажетті әлеуметтік нысандар бой түзеді. Тұрғын үй кезегіндегі отбасылар баспана бақытына кенеліп, инфрақұрылымдық жобалар сәтті жүзеге асты.
Бүгінде бас шаһар жаңару мен жаңғырудың, өркендеу мен өрлеудің үлгісіне айналып отыр. Заманауи инфрақұрылыммен, әлеуметтік және экономикалық тұрақтылығымен, өндіріс пен кәсіпкерлік өркендеген өңірдің өрісі кеңейген. Мемлекет басшысының, Үкіметтің тұрақты қолдауы негізінде және аймақ басшысының үйлестіруімен Сыр өңірі ауқымды жобалар мен тың бастамалар арқылы көшбасшылар қатарынан көріне беретініне сенім мол.
Гауһар ҚОЖАХМЕТОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!