Бүгінде баспасөздің құлдырауын цифрлық дамумен байланыстыратындар көп. Технология дамыған сайын адамдар жаңалық білу үшін цифрлық ақпарат құралдарына көбірек жүгінеді. Интернет немесе мобильді құрылғылардың жетілуі де жаңалықтарға қол жеткізуді оңай әрі ыңғайлы етуде. Бұл газет сатылымының төмендеуіне әкелді.
Бүгінгі тұтынушылар жаңалықтарға жылдам және оңай қол жеткізгісі келді. Ал цифрлық медиа дәл қажеттілікті қамтамасыз етті. Медиа ландшафтта айтарлықтай өзгеріс орын алып, цифрлық медиа жаңалықтар мен ақпараттың басым көзіне айналды.
Сонымен қатар әлеуметтік медиа мен онлайн жаңалықтар алаңының ұлғаюы баспа газеттерінің аясын тарылтты. Facebook және Instagram сияқты әлеуметтік платформалар көптеген адам үшін негізгі жаңалықтар көзіне айналған. Артықшылығы, жаңалық, мақала, шұғыл хабарды пайдаланушылар кез келген уақытта және жылдам ала алады. Мұндай сарынға ілесу үшін CNN және BBC News секілді медиа орталықтар өз интернет-жаңалықтарын қалыптастыруға дағдыланған.
Соңғы жылдары газет индустриясы айтарлықтай өзгерістерге ұшырады. Әсіресе, жаңа бизнес үлгілерімен тәжірибе алмасу, жаңаша ойлау, инновация әлеуетін ескеру алдыңғы орынға шықты. Баспа жарнамасы сияқты дәстүрлі кіріс ағыны құбылып, баспагерлер табыс табудың жаңа жолын зерттеуге көшті. Түрлі эксперимент арқылы хабар тарату әдісі, газетке жазылу тәсілі, БАҚ-пен серіктестік бағыттар жаңарғанын байқаймыз. Осы ретте бизнесті ескеріп, газеттерді цифрлық дәуірге бейімдеу рентабельділік әрі тұрақтылық көрсеткішін көтерудің негізгі жолына айналды.
Айта кетейік, газеттер одан әрі өркендете алатын сала – жоғары сапалы журналистика мен зерттеуге баса назар аудару. Себебі жалған жаңалық пен жалған ақпараттың көбеюі сенімді ақпарат көздеріне деген қажеттілікті арттыруда. Ал нақты ақпарат беруші рөлді газеттер атқара алады. Ал журналистік зерттеуге келсек, инвестиция салу арқылы газеттер маңызды оқиғаларды сараптап, тіпті билік басындағыларды жауапқа тарта алады. Журналистиканың бұл түрі оқырманның қызығушылығын арттырады.
Алайда онлайн-мазмұнды монетизациялау мәселесі газет индустриясына үлкен кедергі болуда. Сандық медиа аудиторияға кеңірек қолжетімділікті қамтамасыз еткенімен, олар баспа газеттеріндегі жарнамадан түсетін кірістің төмендеуіне әкелді. Табыстың жалғыз тәсілі ретінде жарнамалық модельге тәуелділік интернет-БАҚ-қа қызметін қолдау үшін жеткілікті табыс табуды қиындатады. Нәтижесінде газеттер өздерінің онлайн мазмұнын монетизациялау үшін ақылы қызмет және жазылым сияқты жаңа кіріс үлгілерін жаңғыртуға тиіс. Газеттердің болашағы олардың осы өзгермелі тенденцияларға бейімделу қабілетіне және мазмұнын монетизациялаудың инновациялық жолдарын табуына байланысты болады.
Интернет пен әлеуметтік медиаға қарамастан, газеттер қоғамдағы орнын сақтап қалу мүмкіндігіне ие. Олар оқырмандарға терең талдау, сапалы журналистика және сапады редакциялық процестерді ұсына алады. Сайып келгенде, газеттердің болашағы олардың жаңа жағдайларға бейімделу, инновациялар енгізу, аудиториясына сәйкес контент өндіруіне тәуелді.
Мәтін мен фото авторы МӘТІНБЕК
Жылдам ақпарат алу үшін Facebook, Instagram желілері мен Telegram каналымызға жазылыңыз!