«AMANAT» партиясының 2023–2027 жылға арналған «Халықпен бірге!» сайлауалды бағдарламасы аймақта жүйелі түрде жүзеге асырылып келеді. Бүгінде барлық бағыттағы нақты жол карталары бекітіліп, іс-шаралар тұрақты өткізілуде. 2025 жылдың қорытындысымен облыста сайлауалды бағдарламаның орындалу деңгейі 91,9 пайызды құраған. Жол картасына енгізілген 110 іс-шараның 101-і толық орындалған, қалған іс-шаралар орындалу сатысында тұр. Атап өту керек, партияның облыстық филиалы бұған дейін республикада үш жыл қатарынан сайлауалды бағдарламаны 100 пайыз орындаған үздік филиалдардың бірі. Бұл туралы «AMANAT» партиясының облыстық филиалының төрағасы Жандос Базартай БАҚ өкілдеріне берген брифингте мәлімдеді.
– Біздің басты ұстанымымыз – халыққа берілген әрбір уәденің нақты нәтижемен орындалуы. Партия жұмысының тиімділігі сандармен емес, тұрғындардың өмір сапасындағы оң өзгерістермен өлшенуі тиіс. Әділетті қоғамды біз қалыптастыруымыз керек. 2025 жылы өңірде сайлауалды бағдарламасы аясында әлеуметтік маңызы бар бірқатар ірі жобалар іске асырылған. Атап айтқанда, 10 елді мекен газдандырылып, облысты газбен қамту деңгейі 83 пайызға жеткен. Спорт саласында 6 дене шынықтыру-сауықтыру кешені пайдалануға беріліп, халықты спорттық инфрақұрылыммен қамту көрсеткіші артқан, – деді Жандос Базартай.
Аймақта білім беру бағытында «Келешек мектептері» ұлттық жобасы аясында 4200 орындық 5 «Келешек мектебі», 3 мектеп іске қосылып, қосымша 6 білім ордасына күрделі жөндеу жұмыстары жүргізілген. Ауызсумен қамту бойынша 2025 жылы облыс халқы орталықтандырылған ауызсумен 100 пайыз қамтылған. Денсаулық сақтау, мәдениет, тұрғын үй құрылысы, жол және жылу желілерін жаңғырту салаларында да ауқымды жұмыстар атқарылған.
Партиялық бақылау комиссияларының аймақтық және аумақтық деңгейлерде 94 отырысы өтіп, оларда көтерілген 566 ұсыныстың 400-і орындалған. Жол картасында көрсетілген 84 нысанға партиялық бақылау бекеттері орнатылып, бүгінгі күні 80-і пайдалануға берілген. Партиялық бақылау комиссияларынан бөлек барлық деңгейдегі мәслихаттардағы фракциялардың жұмысы жаңа жолға қойылған. Есепті кезеңде мәслихаттардағы фракциялардың 61 отырысы өткізіліп, фракция мүшелерімен тиісті органдарға 1377 депутаттық сауал жолданған. Сонымен бірге партия жанындағы Кеңестердің 62 отырысы өтіп, оларда қаралған 124 мәселе бойынша 435 ұсыныс тиісті органдарға жолданған. Қоғамдық қабылдау бөлмелеріне 8212 арыз-өтініш түсіп, олардың 60,5% оң нәтижесін көрсеткен. 3170 өтініш бойынша заңнамалық түсіндірмелер мен құқықтық кеңестер берілген. Сондай-ақ елді мекендерде 130 мобильді қабылдау өткізіліп, көтерілген 1174 мәселенің 51 пайызы шешімін тапқан. Мониторинг жұмыстары да жиі өткізіледі деседі.
– Партиялық бақылау комиссиясымен бірге мектептер мен аурухана асханаларына, әлеуметтік нысандардың қысқы жылыту маусымына дайындығына және азық-түлік бағасын тұрақтандыру мақсатында мониторинг жұмыстары жүргізіліп тұрады. Мониторинг барысында нысандарда орын алған кемшіліктерді дер кезінде жою үшін арнайы топ мүшелерімен, жауапты органдардың қатысуымен жедел жиындар өтіп, ескертулер жасалады. Нәтижесінде қоғамға зиян келтіретін бірқатар әрекеттердің алдын аламыз. Бір реттік тексеріс аздық етеді. Сондықтан үздіксіз тексеруді қолға алдық, – дейді филиал төрағасы.
Брифинг барысында партияның облыстық филиалының төрағасы партиялық жобалар мен филиал жанындағы «Жастар рухы» Жастар қанатымен атқарылған жұмыстарды да тілге тиек етті.
Мәселен, өңірде өткен жылы «Ауыл аманаты» жобасы аясында 2 мрлд 490 млн теңгеге 297 жоба қаржыландырылған. Сонымен қатар «Жер аманаты» жобасы бойынша 60,0 мың гектар жерді қайтару жоспарланып, 66791 гектар жер мемлекет меншігіне қайтарылған. Оның 1626 гектары заң аясында тұрғындардың пайдалануына берілген. «Қарызсыз қоғам» жобасы аясында 22800 азаматқа қызмет көрсету көзделіп, жүктелген міндет жүйелі орындалған. Жоба қорытындысы бойынша облыс командасы өткен жылы республикада үздіктер қатарынан көрінген.
– Аталған жобалар қоғам үшін қызмет етеді. Мәселен, «Ауыл аманаты» жобасын алайық. Бұл – жас кәсіпкерлерге айрықша қолдау болмақ. Бүгінде өз кәсібін дамытқысы келетін ауыл тұрғындарына мол мүмкіндік беруде. Жоба аясында екі жылдың ішінде елімізде 20 мыңға жуық, біздің өңірде 2 мың жұмыс орны ашылды. «Ауыл аманаты» жобасы аясында үйде отырып тігін тігіп бастаған жан, бүгінде елге танымал тігінші, кәсіпкер. Қарамағында екі адам жұмыс істейді. Сондықтан «Ауыл аманаты» жобасы адам таңдамайды, талғамайды. Тек іскерлік қабілет, ынта болса жеткілікті, – дейді Жандос Базартай.
Өңіріміздегі белсенді жастардың бірлескен жұмысының нәтижесінде әртүрлі бағыттағы облыстық және республикалық маңызды жобалар сәтті жүзеге асырылуда. Өткен жылы атқарылған жұмыстар нәтижесінде «Жастар рухы» жастар қанатының облыстық филиалы республика бойынша үздік деп танылған.
Айдана БАҚЫТЖАНҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!