Елімізде жас ұрпақтың сапалы білім алуына жағдай жасалуда. Уақыт талабына сай жаңа технологиямен қамтылған жаңа білім ордалары «Жайлы мектеп» жобасы аясында жүзеге асты. Екі жыл ішінде ұлттық жоба аясында 460 мың орынға арналған 217 мектеп салу жоспарланса, бүгінде республика көлемінде 105 мектептің құрылысы аяқталып, қалған 112 мектепті жыл соңына дейін пайдалануға беру жоспарланған.
Бұл мектептердің жартысына жуығы ауылдық жерлерде салынып жатқанын ескерсек, алдағы уақытта қала мен ауылда сапалы білім алуда еш кедергі болмайтынын атап өткен жөн. Ұлт болашағының сапалы білім алуына жағдай жасаған ұлттық жоба енді «Келешек мектептері» деген атаумен жалғасын таппақ. Бұл туралы Оқу-ағарту министрі Ғани Бейсембаев оқу жылы аяқталар тұста орталық коммуникациялар орталығында берген брифингте айтты. Сонымен, «Келешек мектептері» қандай болады?
– Бұл жоба – елімізде орта білім сапасын арттыруға және қала мен ауыл мектептері арасындағы алшақтықты жоюға бағытталған стратегиялық бастама. Бұл – жай ғана мектеп ғимараттары емес, ұлт болашағы өсіп шығатын киелі білім ордалары. Сондықтан ұлттық жоба аясында қалыптасатын білім ұйымдарын «Келешек мектептері» деп атауды ұсынып отырмыз», – деді министр.
Бұл мектептердің артықшылығын айта кеткен жөн. Білім ордасының көлемі типтік жобаларға қарағанда, 15-20%-ға үлкен, ал техникалық жарақтануы 4 есеге артық. Барлық мектеп заманауи жиһазбен және құрал-жабдықтармен толықтай қамтамасыз етіліп, қауіпсіздік шаралары күшейтілген. Бастауыш және жоғары сынып оқушылары үшін бөлек блоктар қарастырылған.
Мемлекет басшысының бастамасымен жүзеге асып жатқан «Келешек мектептері» жобасының негізгі мақсаты – жаңа технологиялар мен әдістерді тиімді қолдана алатын білікті мұғалімдермен қамтамасыз ету. Жаңа форматтағы мектептерде педагогтердің кәсіби шеберлігін үздіксіз арттыруға басымдық берілмек.
– Осы мақсатта мұғалімдерге арналған жаңа педагогикалық тәсілдер, заманауи әдістемелер мен цифрлық құралдарды меңгеруге бағытталған бағдарлама әзірленді. Бүгінгі күні 3000-нан астам мұғалім біліктілікті арттыру курстарынан өтті. Алдағы уақытта басым бағыттар бойынша барлық педагогтер оқытумен қамтылады, бұл елімізде кәсіби құзыреттіліктерді дамытудың бірыңғай стандартын қамтамасыз етуге мүмкіндік береді, – деді министр Ғани Бейсембаев.
Сондай-ақ Оқу-ағарту министрі «Келешек мектептері» жобасы аясында салынған білім ұясында оқыту жүйесінің басым бағыттарына кеңінен тоқталды.
– Бұл мектептердегі тәрбие процесі тек білімді ғана емес, сонымен қатар «Адал Азамат» деп атайтын жоғары моральдық қасиеттерге ие және қоғамның дамуына үлес қосуға дайын жауапты, адал, бастамашыл азаматты қалыптастыруға бағытталған. Балалар ерте жастан бастап еңбекті құрметтеу, әлеуметтік әділдік, адалдық және жауапкершілік қағидаларын үйренеді. Осы тұлғалық жеке қасиеттерді біз Қазақстанның табысты дамуының негізі деп санаймыз. Сонымен қатар жоба аясында біз ұлттық мәдениет пен күнделікті өмірдің бір бөлігі ретінде экологиялық тәрбиені қалыптастырамыз. Бұл «Таза Қазақстан» республикалық акциясы идеяларының қисынды жалғасы: экологиялық мәдениет пен қоршаған ортаға ұқыпты қарау мәдениетін қалыптастыру біздің балалармен жұмысымыздың маңызды бағытына айналуда, – деді Ғани Бейсембаев.
«Келешек мектептері» жобасы аясында салынған мектептерде оқушыларға кәсіби бағдар беруді басты назарға алған. Яғни мектеп оқушылары болашақ мамандығына қарай бейімделмек.
– Бастауыш сыныптардан бастап түрлі мамандық иелерімен кездесу, жобалық апталар ұйымдастырылады. 7-сыныпта оқушылар үшін тереңдетілген бейіндік оқыту, тәлімгерлік жүйесі және жеке білім беру курстары енгізіледі. Бұл үдерісті тиімді үйлестіру және басқару мақсатында «Мансап компасы» арнайы цифрлық платформасы әзірленуде. Ол оқушыларға болашақ кәсіби бағытын және әрі қарайғы білім алу жолын саналы түрде таңдауға көмектеседі, – деді министр.
Оқушыларды еңбекке баулу және олардың шығармашылық әлеуетін дамыту мақсатында мектептерде әмбебап шеберханалар мен студиялар, сондай-ақ ерте кәсіби білім беруге арналған арнайы жабдықталған кабинеттер қарастырылған. Атап айтқанда, тігін, аспаздық, ІТ, ағаш шеберханасы және басқа да бағыттар бойынша оқу бөлмелері қажетті заманауи жабдықтармен толық қамтамасыз етілген.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!