Биыл Қызылорда қаласында жол құрылысы ерекше қарқынмен дамуда. Бұрынғы ой-шұқырлы көшелердің тақтайдай тегіс. Таяуда ғана «Тәуелсіздікке – 25 жыл» даңғылы да жаңа келбетке ие болды. Мұндай іргелі жобалар жалғасын тауып келеді. Салаға бөлінген қаржы да қомақты. Бұл туралы қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Жеңісбек Файзуллаев журналистермен жүздесуде айтты.
– Жол-көлік инфрақұрылымын дамыту мақсатында биыл 16,8 млрд теңгені құрайтын 17 жоба қолға алынып, соның ішінде 7,5 млрд теңгесі игерілген. Бұл қаржы республикалық, облыстық және қалалық бюджет есебінен бөлінген. Атап айтқанда, «Тәуелсіздікке – 25 жыл» даңғылы бойындағы «Қызылжарма» каналы арқылы өтетін автокөпір құрылысына 199,8 млн теңге қаралып, нысан маусым айында пайдалануға берілді. Сондай-ақ даңғылды кеңейту жұмыстары аяқталып, жобаның жалғасы ретінде Әбілқайырхан мен Саламатов көшелерін жалғайтын жаңа жолдың құрылысы жүргізілуде. Бұл жұмысқа «УАД» ЖШС мердігер мекемесі жауапты. Бұдан бөлек, ескі базар аумағында және қала ішіндегі бірқатар көшелерде де жол жөндеу жұмыстары жүріп жатыр. Мәселен, 11 көшеге 831,4 млн теңге бөлінген. Атап айтқанда, Әйтеке би, И.Тоқтыбаев, Училищная және И.Журба көшелерінің бөлігі қамтылған – дейді Жеңісбек Файзуллаев.
Жиында Қызылөзек ауылдық округіндегі «Қожақ» каналы үстінен өтетін көпірді күрделі жөндеу жұмыстары басталғаны да айтылды. Жобаның құны – 292,3 млн теңге. Сонымен қатар қаладағы 49 шақырымды құрайтын 77 көшеге күрделі жөндеу, 8 шақырым болатын 16 көшеге орташа жөндеу жұмыстарын жүргізу үшін жоба әзірленіп, қаржыландыруға ұсынылған.
– Көгалдандыру саласында да нақты істер бар. Мемлекет-жекеменшік әріптестік аясында қолға алынған «Қызылорда қаласының аумағын көгалдандыру және абаттандыру» жобасы да сәтті жүзеге асуда. Бұл жобаның 5 жылға арналған жалпы құны 18,6 млрд теңгеге жетеді. Бұл жұмыстарды «ҚазСтройКапитал» компаниясының 250 қызметкері атқаруда. Қала аумағына 800 мың дана гүл көшеті, 13,5 мың көпжылдық гүл, 10 мың шаршы метрден астам көгал төселді. Сонымен бірге 45 шақырымға автоматты суару жүйесі орнатылып, 5000-нан аса спринклер мен ротор іске қосылды, 25 дана ұңғыма мен насос станциялары салынды. Абаттандыру бағытында биыл 3 демалыс орны жаңғыртылып, қаладағы мәдени және демалыс саябақтары да жаңаруда. Атап айтқанда, «Тұңғыш Президент» саябағы мен Қорқыт ата атындағы саябақтарда ауқымды жұмыстар жүргізілуде, – дейді бөлім басшысы.
Брифингте қаладағы 18 көпқабатты үйдің ауласын, ойын алаңдарын, шағын футбол, жаттығу және демалыс орындарын абаттандыру үшін 1,3 млрд теңге қаражат қарастырылғаны да айтылды. Сонымен қатар 20 үйдің қасбеті жөнделіп, бұл бағыттағы жұмысқа 1,4 млрд теңге бөлінген.
Нұржан НҰҒЫМАДИЛЛА
Жылдам ақпарат алу үшін Facebook, Instagram желілері мен Telegram каналымызға жазылыңыз!