Денсаулық сақтау министрі Ақмарал Әлназарова міндетті әлеуметтік медициналық сақтандыру (МӘМС) жүйесінің қаржылық тұрақтылығын қамтамасыз ету мақсатында бірқатар өзгеріс енгізілетінін мәлімдеді.
Енді барлық медициналық ұйымдар қаржыландырудың ашықтығы мен түпкілікті бақылаудың шынайылығын қадағалау үшін бірыңғай медициналық көмек төлем жүйесін енгізуді жоспарлап отыр. Биыл 1 маусымға дейін медициналық қызмет толықтай бақылауға алынбақ.
Министрдің айтуынша, жаңа заң жобасы мемлекеттің, жұмыс берушілердің және азаматтардың ортақ жауапкершілігін арттыруға бағытталған екі негізгі бастаманы қамтиды:
- Қызметкерлердің жарналарын есептеу базасының жоғарғы шегін арттыру.
- Мемлекеттің МӘМС жүйесіне жарна төлеу мөлшерлемесін ұлғайту.
Денсаулық сақтау министрі Ақмарал Әлназарованың айтуынша, медициналық көмекке ақы төлеудің бірыңғай жүйесін енгізу бұл саладағы деректердің толық ашықтығын қамтамасыз етеді. Осылайша елдегі медициналық ұйымдардағы шығыстарға бақылау күшейеді. Сонымен қатар кейбір азаматтар үшін МӘМС жарнасы 5 есеге өсетінін атап өтті.
– 2026 жылдың 1 қаңтарынан бастап МӘМС жүйесіне жарналарды есептеу үшін ең жоғарғы шек қазіргі 10 ең төменгі жалақыдан (ЕТЖ) 50 ЕТЖ-ға дейін артады. Бұл өзгерістер 508 мың адамға, яғни барлық жалдамалы жұмысшылар мен олардың жұмыс берушілерінің шамамен 9%-ына әсер етпек. Себебі қазіргі жүйеде табысы жоғары азаматтар өз табысына сай жарна төлемейді, яғни пропорционалды төлем әділетсіздігі орын алып отыр, – деді министр.
Бұл бастама МӘМС жүйесінің қаржылық тұрақтылығын арттыруға және азаматтарға көрсетілетін медициналық көмектің сапасын жақсартуға ықпал етпек.
Жылдам ақпарат алу үшін Facebook, Instagram желілері мен Telegram каналымызға жазылыңыз!