Әлеуметтік қорғау саласындағы қызметкерлердің басты міндеті – халыққа қолдау көрсету және азаматтардың әл-ауқатын арттыруға бағытталған жұмыстарды жүйелі түрде жүзеге асыру. Бұл сала мамандарының еңбегі қоғамның тұрақтылығы мен сенімнің орнауына тікелей серпін берері анық. Осы орайда әлеуметтік қорғау саласы қызметкерлерінің кәсіби мерекесіне арналған салтанатты жиын А.Тоқмағамбетов атындағы қалалық мәдениет үйінде өтті. Іс-шараға әлеуметтік сала мамандары, үкіметтік емес ұйым өкілдері мен қоғамдық бірлестік жетекшілері қатысты.
Іс-шара барысында әлеуметтік қорғау жүйесін дамытуға және халыққа сапалы қызмет көрсетудегі жоғары көрсеткіштері үшін бірқатар сала үздіктеріне қала әкімінің Алғыс хаттары табысталды. Бұл құрмет – олардың кәсіби біліктілігі мен қоғам игілігі жолындағы еңбегінің бағасы.
– Әлеуметтік қорғау саласын, біздің жұмысымызды ескеріп жатқанына қала әкіміне алғыс білдіреміз. Қала әкімінің алғыс хатымен марапатталдық. Бұл – біз үшін жоғары белес. Алдағы уақытта экономикалық даму мен тұрғындардың әлеуетін арттыруда бірқатар жұмыстар атқарамыз деп сенемін. Әлеуметтік салада еңбек ету – жауапкершілігі мол міндет. Сондықтан біз әр азаматтың жағдайына бейжай қарамай, қашанда қолдау көрсетуге әрдайым дайынбыз, – деді әлеуметтік сала маманы Шынар Берікқызы.
Шара соңында қала әкімдігі әлеуметтік қорғау саласында абыройлы қызмет етіп жүрген барша мамандарға ізгі тілектерін білдіріп, кәсіби мерекелерімен құттықтады.
Айдана Бахтияр
Жылдам ақпарат алу үшін Facebook, Instagram желілері мен Telegram каналымызға жазылыңыз!