Сыр елінің бас қаласы – Қызылорда күн өткен сайын құлпырып, бүгінде өзінің шырайлы келбетімен, тазалығымен көз сүйсінтіп келе жатқаны анық. Соңғы уақытта қала тазалығын айтып әрбіріміз мақтанып жүрміз. Дегенмен көшедегі тазалық өздігінен пайда болмайды. Мұнтаздай таза қаланың арғы жағында таңмен таласа оянып іске кірісетін «Қызылорда тазалығы» мекемесі ұжымының еңбегі жатыр. Бұл мекеме қаланың тазалығын қамтамасыз етуде жүйелі жұмыс атқарып келеді.
Соңғы 10 жылда Қызылорданы көркейту, көгалдандыру, тазалығын қалыпты ұстау мәселесіне ерекше ден қойып, тиісті шаралар қолға алынып келеді. «Қызылорда тазалығы» мекемесі бүгінде шаһардың мұнтаздай таза болып тұруы үшін қарқынды тірлік жасауда. Бұл мекеменің ауқымды істерінің нәтижесінде қоқыс тастайтын полигон салынған. Бүгінде қоқыстарды сол жерге тастап, сұрыптайды. Ал көпқабатты тұрғын үйлердің арасындағы контейнердегі қоқыстарды алу үшін машиналар бөлінеді.
«Қызылорда тазалығы» мекемесінің мәліметіне сүйенсек, осы жылдың мамыр айынан бастап кәсіпорынға «Жасыл Қызылорда» мекемесінің жабылуына байланысты 76 жұмысшы қосылған. Осылайша, штаттық кестеде барлығы 632 жұмыскерді құрайды. Қазіргі таңда мекеме қаламыздың 500-ден аса көшелерінің санитарлық тазалық жұмыстарын жүргізуде. 916 көпқабатты тұрғын үй, жеке сектор бойынша 563 көше кестеге сәйкес тұрмыстық қатты қалдықтары шығарылады. Осы жылдың қаңтар – шілде айлары аралығында жалпы полигонға 325 109,52 м3 қоқыс тасымалданған. Бүгінде қаланың санитарлық тазалығына және тұрмыстық қатты қалдықтарды шығаруға 93 арнайы техника жұмылдыруда.
– Күнделікті 12 бригада санитарлық тазалық бойынша жұмысқа шығады. Таңертең сағат 7-30-дан қаланың шеткі аймақтарынан бастап тазалық жұмыстарына кіріседі. Сол жағалау, Талсуат ауылдық округіне бара жатқан жолдар, «Бәйтерек» шағын ауданы және Тасбөгет кентіне дейінгі аумақтың тазалығына қараймыз. Мұнда жұмыс істейтіндердің еңбегі адал. Олар қандай қиындыққа да шыдап, бар күшін салады. Қазіргі таңда тазалық жұмыстары қарқынды жүруде, – дейді «Қызылорда тазалығы» мекемесінің санитарлык тазалық бойынша сектор меңгерушісі Гүлзинат Жұмабекова.
Қаланың санитарлық тазалығы бойынша «Қызылорда тазалығы» өз жұмысын тұрақты атқаруда. Атап айтқанда, брусчатканы әктеу, қоршауларлы жуу мен сырлау, ескерткіштерді, су бұрқақтарды, аялдамаларды, аллея мен скверлерді, Қызылорда қаласының паспорттарын жуып тазалау секілді барлық жұмыстарды атқарады. Күн сайын қала таза болып тұруы басты мақсатқа айналған.
– Қала көшелерінің тазалығын қамтамасыз ету бағытында тазалықшылар белсенді жұмыс істейді. Жоспарға сәйкес күнделікті жұмыстар уақытылы аяқталады. Мәселен, жаз айларында көше арам шөптерден тазартылып, бордюрлер, көше бойындағы талдар толығымен ақталды. Күн сайын көшелерге екі мезгіл су себілетін. Әр шағын аудан уақытында қоқыс қалдықтарынан тазартылып тұрады, – дейді Гүлзинат Жұмабекова.
Сондай-ақ мекеме «Таза Қазақстан» экобағдарламасы аясында қала әкімдігі ұйымдастырған қалалық сенбіліктерге белсенді түрде қатысады. Мекеме қызметкерлері қаламызда өтіп жатқан ауқымды шаралардың барлығында қала тазалығы үшін аянбай тер төгуде. Олар мұнтаздай тазалықты мақсат етеді.
Қала тазалығы бір мекеменің ғана емес, тұрғындардың да қолында. Мәселен, «Қызылорда тазалығы» мекемесі бүгінде шаһардың мұнтаздай таза болып тұруы үшін қарқынды жұмыс істеуде. Дегенмен арқаны кеңге салып отыра бермей, тазалыққа сіз де үлес қосыңыз. Ауланы ретке келтіріп, ұқыпты ұстау санитарлық талап қана емес, мәдениет пен талғамның белгісі. Тазалық – табалдырықтан басталатынын ұмытпаңыз.
Бетті дайындаған
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!