«Orda» жоғары колледжі – уақыт талабына сай бәсекеге қабілетті, кәсіби маман даярлауды мақсат еткен оқу орындарының бірі. Іргетасы 2001 жылы қаланып, осы жылдар ішінде жеткен жетістігі аз емес. Уақыт талабына сай жыл сайын жаңарып келе жатқан оқу орнының жұмысшы маман даярлауда өзіндік орны бар. Мұның бәрі ұжымдағы оқытушылар мен студенттердің бірлескен, үндескен жұмыстарының нәтижесі.
– Колледж 2001-2002 жылы «Қызылорда заң» колледжі болып ашылып, «Құқықтану» мамандығы бойынша 127 талапкерлер қабылдаған. Содан кейін 2004-2005 оқу жылында «Кеден ісі», «Банк ісі», «Салық ісі», «Бастауыш сыныпты оқыту», «Аударма ісі», «Қазақ тілі мен әдебиеті пәнінің мұғалімі», «Экономика, бухгалтерлік есеп және аудит» мамандықтары ашылып, колледж атауы «Қызылорда гуманитарлық заң колледжі» болып өзгертілді. Оқу орны 2020 жылы «Orda» жоғары колледжі мемлекеттік емес білім беру мекемесі болып атауын өзгертті, – дейді «Orda» жоғары колледжінің директоры Гүлжамила Досжанова.
Қазір колледжде 2048 студент білім алуда. Жыл сайын мұнда еңбек нарығындағы сұранысқа сай мамандықтар толығуда. 20 жылда білім ордасы талай биіктерді бағындырды. Оқу орны халықаралық білім кеңістігіне еркін қанат жая бастады. Жыл өткен сайын жаңа мамандықтар қосылып, колледждің оқу-материалдық базасы жаңарды. Уақыт сұранысына сай білім алушылар саны жылдан-жылға артты. Автомобиль көлігіне техникалық қызмет көрсету, жөндеу және пайдалану мамандығына сұраныстың көбеюіне байланысты колледж базасында биылғы оқу техникалық жөндеу орталығы қолданысқа берілген. Электроника – ІТ саласының, робототехника, мехатроника сияқты ғылымдардың негізі. Сол себепті оқу орнында «Электроника» құзыреттілік орталығы ашылған. Алдағы уақытта колледж студенттерін ғана емес, басқа да оқу орындарының оқытушыларына, студенттеріне арналған курстар, тәжірибелік сабақтар өткізу жоспарлануда.
Колледж білім алушыларына жалпы үш әлеуметтік төлем жүргізіледі. Олар: мемлекеттік шәкіртақы, ыстық тамаққа бөлінген қаражат және ауылдық елді-мекендерден оқуға түскен білім алушылар үшін қалааралық теміржол және автомобиль көлігінде жеңілдікпен жол жүруді қамтамасыз ету қағидаларына сәйкес жол жүруге өтемақы төленеді.
– Колледжімізде соңғы жылдары студенттердің басым көпшілігі ІТ және автомобиль көлігіне техникалық қызмет көрсету, жөндеу және пайдалану мамандығына таңдау жасап, оқуға қабылданды. Осы мамандықтарға қызығушылық артып, соған сай білім беруді мақсат еттік. Бұл мақсатта автокөлік, ІТ саласы бойынша Германия, Швейцария елдерінен арнайы эксперттер шақырдық. Олар соңғы технологиялар бойынша үш апталық курс өткізіп, тәжірибелерімен бөлісті. Оқытушыларымыз қайта даярланып, біліктілігін арттырды. Соңында «Халықаралық тәжірибе – колледж кеңістігінде» атты баспасөз мәслихаты өтті. Іс-шараға колледждің ақпараттық технология мамандары, автокөлік жөндеу саласының оқытушылары, өндірістік оқыту шеберлері мен олардың шәкірттері қатысты. Швейцариядан келген ІТ маманы Уолтер Шмуц «Ақпараттық қауіпсіздік», «Бағдарламалық қамтамасыз ету» бейіндері бойынша дәріс беріп, өз тәжірибесімен бөліссе, автомобиль жөндеу маманы Манфред Циглер көлік жөндеудің қыр-сырын айтты. Колледж әлемдік білім беру кеңістігіне қосылу жолында ілгері қадам жасауда. Білім беруді әлемдік стандарттық деңгейге көтеру, бәсекеге қабілетті жаңа буын қалыптастыру, білім беру қызметі нарығынан орын алу, жетекші отандық және шетелдік білім беру мекемелерімен тең дәрежеде қарым-қатынас орнату мақсатында «Орда» жоғары колледжі академиялық ұтқырлық бағытында Қырғызстан Республикасы, Қырғызстан халықаралық универсалды колледжімен, ИСИТО колледжімен, Ж.Баласағұн атындағы Қырғыз ұлттық университетімен, Халықаралық ІТ және бизнес колледжімен меморандумға қол қойды. Оңтүстік Кореяның Sokuluk Sejong оқу орны басшысы Лю Бенг Ил мырзамен әріптестік байланыс орнатты. Сонымен қатар Түрік елінің оқу орындарымен келіссөз жүргізуде, – дейді колледж директоры.
Жаңа Қазақстанды құруда әрбір жас өз үлесін қосуы тиіс. Мемлекеттің дамуына өзіндік қолтаңба қалдыру мақсатында бүгінгі ұрпақ білікті де білімді маман иесі болуға талпынуы қажет. Осы тұрғыда колледж студенттері алдына айқын мақсат қойған.
Мәселен, автокөлікке техникалық қызмет көрсету мамандығы бойынша 3-ші курс студенті Айболат Мұхамедияр болашақта машина жөндеу кәсібін ашуда мақсат еткен.
– Мамандық таңдау – өмірдегі маңызды шешімдердің бірі. Қоғамда әр мамандықтың өз орны бар. Бірі білім берсе, енді бірі емдейді. Ал үшіншісі адамдардың күнделікті өмірін жеңілдетуге үлес қосады. Солардың бірі – көлік жөндеушілер. Бұл мамандықтың да адамға тигізер көмегі көп. Осы мамандыққа қатты қызықтым. Мен мамандығымды кәсібіммен байланыстырғым келді. Болашақта машина жөндеу бойынша кәсіпті қолға алу жоспарда бар. Осы кезде дейін бұл салада көптеген қажетті дүниені үйрендім. Сондай-ақ таныстарымның көлігі бұзылып қалса, тәжірибелік тұрғыда білгеніммен көмектесемін. Бұл қызмет маған ұнайды, – дейді ол.
Бұл оқу орында қазіргі уақытта студентті кәсіби маман етіп шығару мақсатында жүйелі жұмыс жүруде. Оқу орны қоғамға қажетті жұмысшы мамандарды даярлауда өз үлесін қоса бермек. Осы уақытқа дейін жеткен жетістігі аз емес. Мәселен, облыс бойынша өткен «Үздік колледж – 2009» байқауында «Үздік» номинациясын иеленген. Сондай-ақ Оңтүстік өңірлердегі оқу орындары ішінен «Алтын көшбасшы» сертификатына иеленген. Одан бөлек «WorldSkills Kazakhstan-2024» ұлттық чемпионатында «Мобильді робототехника» құзіреттілігі бойынша Ертай Абылайхан мен Абдугани Исмоил «Үздік маман» атағын жеңіп алған.
– Биыл «Жұмысшы мамандықтар жылы» деп жарияланды. Бұл мамандықтың мәртебесі артып, жастардың қызығушылығын оятады деп ойлаймын. Ең бастысы әркім жауапкершілікті терең сезініп, өз міндетін сапалы атқаруы тиіс. Біз де қоғамға жаны ашып, шын еңбек ететін нағыз еңбек адамдарын дайындауды мақсат етіп отырмыз, – дейді «Orda» жоғары колледжінің директоры Гүлжамила Досжанова.
Жұмысшы мамандықтары жылы қоғамда еңбекқорлық пен кәсіпқойлық идеясын ілгерілетуге ықпал етеді. Бұл тұрғыда мектеп қабырғасынан үлкен өмірге алғаш қадам басқан жастың білікті маман болып қалыптасуына баулитын кәсіптік білім беретін оқу орындарының атқаратын рөлі зор. Осы жыл еңбек адамдарына деген ерекше құрметтің белгісі ретінде есте қалары анық.
Айтолқын БАТЫРБАЙҚЫЗЫ
Суретті түсірген
Нұрболат Нұржаубай
Жылдам ақпарат алу үшін Facebook, Instagram желілері мен Telegram каналымызға жазылыңыз!