Халық жазушысы Әбдіжәміл Нұрпейісовтің 100 жылдығына орай «Ғасырлар толқынының дарабоздары» шарасы Ә.Нұрпейісов атындағы әдебиет үйінде «Әлем таныған Әбе» салтанатты жиынымен ашылды.
Қаламгер тойына арналған жиында аудандық мәдениет үйі өнерпаздарының «Теңіз – өмір арнасы» атты қойылымы көрерменге ғаламат әсер сыйлады. Қасиетті Сыр топырағында өмірге келіп, бүкіл ғұмырын ұлтымыздың рухани кемелденуіне және қазақстандықтардың шығармашылық мүмкіндігін әлемдік әдеби аренада танытуға арнаған қайраткердің өмірі мен шығармашылығын арқау еткен қойылым ұлт руханиятын ұлықтаған өңірдің маңызын арттыра түскендей. Облыс әкімі орынбасары Ш.Байманов теңізде туған талантқа құрметтің толастамайтынын жеткізді.
– Көк теңіздің биік нүктесі саналатын Беларан төбеде арнайы ас беріліп, рухына Құран бағышталды. Бүгінде бұл төбеде символикалық мәні бар қауырсын қалам бейнесіндегі арнайы мемориалдық белгі орнатылған. Елге ортақ аңыз тұлғаларға тән бұл жер Әбенің екінші жайы ретінде тарихта қалары сөзсіз. Бұдан бөлек, жақында ғана Алматы қаласында қаламгердің есімін ұлықтау мақсатында Ә.Нұрпейісовтің 100 жылдығына арналған халықаралық ғылыми-танымдық конференция өтті. Конференцияға Қазақстан Республикасының Мәдениет және ақпарат министрі арнайы келіп қатысып, ел Президенті Қасым-Жомарт Кемелұлының жедел хатын табыстады. Қаламгерге құрмет мұнымен шектелмейді. Ел есінде қалған есімнің алда да жаңғыра беретіні сөзсіз, – деді ол.
Қаламгер тойына келген қадірменді меймандар Әбдіжәміл Нұрпейісов атындағы әдебиет үйінде оның шығармашылығы мен өмірі туралы тың деректерге қанықты. Мұнда Әбе болмысын аша түсетін рухани құнды қазыналар жинақталған. Түрлі тарихи суреттер мен қолжазбалар, Әбенің өзі тұтынған заттары мен сан алуан экспонаттар жиынтығы, классик жазушының өз қолымен қайта өңдеген кітабы қонақтарға ең құнды жәдігер ретінде таныстырылды.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!