Қант диабеті – әлемді алаңдатқан мәселенің бірі. Эпидемиологиялық зерттеулер бойынша жыл сайынғы өсім науқастардың жалпы санының 5-9% – ын құрайы. Бұл ретте әрбір 15 жыл сайын қант диабетімен ауыратын науқастар саны екі есе артуда.
Елімізде соңғы онжылдықта қант диабетімен ауыратын науқастардың саны артып келеді. Бұл аурудың алдын алуды, диабет мектептерін ұйымдастыруды және салауатты өм ір салтын, дұрыс тамақтануды насихаттау бағдарламасын әзірлеуді қажет етеді.
Дүниежүзілік денсаулық сақтау ұйымының дерегінше, қант диабетінің симптомдары кенеттен пайда болады. Әсіресе 2-типті қант диабетінің белгілері жеңіл өтіп, олардың нақты анықталғанына дейін бірнеше жыл қажет болуы мүмкін. Уақыт өте келе ауру жүрекке, көзге, бүйрекке, сондай-ақ жүйке жүйесіне зақым келтіруі ықтимал. Сондай-ақ әйелдер арасында ерлерлерге қарағанда өлім жағдайлары жоғары.
Қант диабетімен ауыратын науқастарға арналған мектептің басты мақсаты – өзін-өзі бақылау әдістеріне үйрету, тағайындалған емді жеке өмір жағдайларына бейімдеу, аурудың созылмалы және жіті симптомдарының алдын алу бойынша сабақтар өткізу маңызды.
Жүргізілген зерттеу нәтижесінде емделушілердің қант диабеті туралы ақпараттандырылу деңгейі 62,5%-дан, 96%-ға артты. Демек, осы аурумен байланысты қиындықтарды сәтті еңсеру және өмір сүру сапасын арттыру үшін диабетпен ауыратын науқастардан ең алдымен емдеуші дәрігердің барлық ұсыныстарын қатаң сақтау, диабет денсаулық мектебінде оқу талап етіледі. Қант диабетінің алдын алу мен емдеудегі озық шешім – адамдарды диабет мектебінде оқыту.
Диабет мектебін жүргізуші медбикенің үлесі – оңтайлы емдеу үшін маңызды. Олар науқастардың емдеу сызбасын сақтауына ғана қол жеткізіп қана қоймай, сондай-ақ дәрігерден жасырын болуы мүмкін кедергілерді жоя алады және науқастардың өздерінің емдеу мәселелеріне қатысуын қамтамасыз ете алады. Бұдан басқа, медбикелер диабет мектебін ұйымдастыру бойынша бірқатар іс-шараларды өткізуге маңызды үлес қосады. Демек, қант диабетінің жалпы емдеу процесіндегі мейірбикенің рөлі өте өзекті және маңызды. Сондықтан қант диабетімен ауыратын пациенттердің сапалы өмір сүруіне Диабет денсаулық мектебінің пайдасы орасан зор.
Ақмарал ДАРХАНБАЕВА,
көп бейінді облыстық аурухана,
эндокринология бөлімшесінің медбикесі
Ғылыми жетекшісі:
Гүлмира ЖОЛАМАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!