Кеңесіп пішкен тон келте болмайтындай кез келген мәселені талқыға салып шешім шығаруда қоғамдық кеңестің маңызы ерек. Облыс әкімдігінің мәжіліс залында қоғамдық кеңестің бірінші отырысы өтті. Облыстық мәслихат төрағасы Мұрат Тілеумібетов қатысқан шарада жаңадан сайланған коғамдық кеңес мүшелеріне куәлік табысталды.
Қоғамдық кеңес құрамындағы жұмысшы топқа азаматтық қоғам қалыптастыруға үлес қосатын белсенділер тартылған. Кандидаттар арасынан жеке сұхбат арқылы іріктеліп алған кеңес мүшелері ішінде мемлекеттік қызметкерлер де бар. Жалпы құрамы 32 адамнан тұратын топта халықтың ортасында жүріп, ел мүддесін жеткізуге ықпал ететін, өзіндік пікірі бар тұлғалар жиналды.
Әлем экономикасы тұралап тұрған шақта Президент көрпеге қарай көсілуді тапсырған еді. Биылғы жаңа бюджет кодексін негізге ала отырып жұмыс жүргіземіз деген Айнұр Тұңғышбаева бұқаралық ақпарат құралдары атынан қоғамдық кеңеске мүше болды.
– Өткен жылы құқық саласында қызмет атқардым. Жаңа қоғамдық кеңесте бюджет саласы жүктелді. Мақсатымыз қаржының тиімсіз жұмсалуын болдырмау. Өткен жылы осындай кемшіліктер балабақша мен арт-спорт саласында байқалған еді. Бөлінген әрбір қаржы халық игілігіне жұмсалсын деген мақсатпен қадағалау жұмысын қатаңдатамыз, – дейді ол.
Қоғамдық жобалар саласында да мониторинг пен талдау жүргізу үшін жоспар әзірленуде. Жоспар аясында жобаларды құқықтық сараптаудан өткізіп, азаматтық қоғам өкілдерімен тыңдау өткізіледі. Алғаш рет қоғамдық кеңеске мүше болған Шакизат Қаратайұлы кемшілік анықталған жағдайда уәкілетті органдарға ұсыныстар жолдаймыз, – дейді ол.
– «Сенімен болашақ» республикалық қоғамдық бірлестігінің атынан қоғамдық кеңеске мүше болу мен үшін үлкен сенім мен жауапкершілік. Қоғамдық жобалардың сапалы жүзеге асуын бақылауда қоғамдық кеңестің рөлі маңызды. Кеңес тек кеңесші орган ғана емес, сонымен бірге қоғам мен билік арасындағы ашықтық пен сенімділікті арттыратын маңызды құрылым. Құқықтық қамтамасыз ету жөніндегі салалық комиссияның мүшесі ретінде біз жобалардың құқықтық негізде жүзеге асуын, заң талаптарына сәйкестігін басты назарда ұстаймыз, – деді ол.
Кеңес мүшелерінің ұсынысымен Ы.Жақаев атындағы Қазақ күріш шаруашылығы ғылыми-зерттеу институтының бас директоры Сұлтанбек Тәуіпбайұлының кандидатурасы қолдау тауып, ашық дауыс беру арқылы облыстық қоғамдық кеңестің төрағасы болып сайланды.
Жұмысшы топтың әлеуетін дамыту жолында қоғамдық бақылаудың пәрменділігін нығайту, халықтың жергілікті басқаруға деген сенімін қалыптастырады. Дегенмен қоғамдық кеңес тиімділігі белсенділердің тәуелсіздігі мен халықпен етене араласуына байланысты.
Думан КЕҢШІЛІК
Жылдам ақпарат алу үшін Facebook, Instagram желілері мен Telegram каналымызға жазылыңыз!