«Үздік педагог» байқауы елімізде 2012 жылдан бері өткізіліп келеді. Өткен жылдың қорытындысы шарасында облыс әкімі Нұрлыбек Нәлібаев аймақтағы «Үздік педагог» облыстық байқауының жеңімпаздарын марапаттады. Қаламыздағы С.Толыбеков атындағы №3 ІТ-мектеп-лицейінің физика пәнінің мұғалімі, педагог-зерттеуші Роза Ерімбетова «Үздік педагог» байқауында үздіктер қатарынан көрінді. Үздік ұстазбен әңгімелесудің сәті түскен еді.
– Жыл қорытындысы бойынша «Үздік педагог – 2025» марапатын ие болдыңыз. Құтты болсын! Бұл марапаттың артында үлкен еңбек жатқаны анық. Ұстаздық жолыңыз жөнінде айтып өтсеңіз…
– «Үздік педагог – 2025» марапаты – мен үшін үлкен құрмет әрі жауапкершілік. Бұл жетістік – жылдар бойы жинақталған тәжірибе, үздіксіз ізденіс пен оқушыларыммен бірге атқарған тынымсыз еңбектің нәтижесі деп білемін. Физика пәні мұғалімі ретінде еңбек жолымды қарапайым мектептен бастадым. Бастапқы жылдары әр сабағыма жаңалық енгізуге тырыстым. Заман талабына сай оқытудың тиімді әдістерін, оның ішінде цифрлық технологияларды, модельдеуді, зертханалық жұмыстарды кеңінен қолданып келемін. Оқушылардың қызығушылығын арттыру үшін элективті курстар ұйымдастырып, ғылыми жобаларға жетекшілік еттім. Осы жылдар ішінде көптеген шәкірттерім қалалық, облыстық, республикалық жарыстарда жүлделі орындарға ие болды. Бұл менің кәсіби мотивациямның бір көзі. Алда да білім сапасын арттыру жолында аянбай еңбек етіп, оқушыларды ғылымға баулуды жалғастырамын.
– Бала кезден мұғалім болуды армандадыңыз ба, әлде тағдыр жетеледі ме?
– Мен Қазалы қаласында дүниеге келдім. №16 М. Горький атындағы орыс орта мектепте білім алдым және дәл осы мектепте физика пәнінің мұғалімі болып еңбек жолымды бастадым. Бала кезімнен математика пәнінің мұғалімі болуды армандадым. Елена Николаевна апайым маған осы пәнге деген қызығушылықты оятып, бағыт берді. Оқушы кезімнен олимпиадаларға қатысып, білімге құштар болдым. Физика пәніне деген қызығушылығым да осы математика арқылы қалыптасты. Себебі физикадағы жетістіктерімнің артында логикалық ойлау мен есептеуге бейімділік жатыр.
– Сіздің ойыңызша, жақсы мұғалім қандай болу керек? Оны өзгелерден даралап тұратын қандай қасиет деп ойлайсыз?
– Менің ойымша, нағыз мұғалім – білім үйретуші емес, әр баланың жүрегіне жол тауып, оның қабілетіне сеніп, адамгершілік пен жауапкершілікті өз өнегесі арқылы сіңіре білетін үлкен жүректі тұлға болу. Оны өзгелерден даралап тұратын басты қасиет – жанашырлық пен шынайы ықылас. Мұғалім әр оқушыны түсіне білсе, оны көтермелеп, шабыттандыра білсе, баланың есінде қалады. Сонымен қатар үздіксіз ізденіс, жаңашылдыққа ашықтық және өз ісіне деген сүйіспеншілік – нағыз ұстаздың ажырамас белгілері.
– Сіз үшін мұғалім мен оқушы арасындағы сенім қаншалықты маңызды?
– Мен үшін мұғалім мен оқушы арасындағы сенім — тәрбиенің де, білім берудің де өзегі. Сенім бар жерде ашық диалог, өзара түсіністік, шынайы байланыс орнайды. Оқушы өз ұстазына сенсе, сұрақ қоюдан, қателесуден қорықпайды, пікірін ашық білдіреді. Ал мұғалім оқушысына сенсе, оның мүмкіндігіне шек қоймайды, қолдап, жігерлендіріп отырады. Сондықтан сенім – оқу процесін тиімді етіп қана қоймай, бала тәрбиесінде де үлкен рөл атқарады.
– Қазіргі білім беру жүйесіндегі басты өзгерістерге көзқарасыңыз қалай? Бүгінгі шәкірт жүрегіне жол табу қиын емес пе?
– Қазіргі білім беру жүйесінде үлкен өзгерістер болуда. Цифрландыру, құзыреттілікке негізделген тәсіл, академиялық еркіндік, оқушының жеке қабілетін дамытуға бағытталған білім беру. Бұл жаңашылдықтар уақыт талабына сай, заман ағымына бейімделуге мүмкіндік береді деп ойлаймын.
Бүгінгі шәкірт бұрынғыдан өзгеше. Олар – еркін, ақпаратқа қанық, пікірін ашық айтуға бейім. Жүрегіне жол табу қиын емес, бірақ ол үшін мұғалім де үнемі ізденісте болуы керек. Баланың қызығушылығын түсіну, тілін табу, сенімін ояту – міне, сол кезде ғана мұғалім мен шәкірт арасында тығыз байланыс орнайды.
– «Үздік мұғалім» атану сіз үшін нені білдіреді?
– Ахмет Байтұрсынұлы «Мұғалім – мектептің жүрегі» деген. Бұл сөз – мен үшін тек қанатты тіркес емес, ұстаздық жолымның мәні мен мағынасы. Себебі мектептегі барлық тәрбиелік те, білімдік те процесс – мұғалімнің жүрегі мен жан жылуына байланысты. Сол себепті «Үздік педагог» атағын иелену – мен үшін үлкен құрмет қана емес, дәл осы жүрекпен сезінген, шын ниетпен атқарған еңбегімнің бағалануы. Бұл марапат маған жаңа серпін беріп, әр оқушының жүрегіне жол табуға, білім беруде жаңашылдыққа ұмтылуға, әріптестеріммен бірге даму жолында еңбек етуге жігерлендіреді. Шәкірттерімнің жетістігі – менің басты марапатым, ал «Үздік педегог» атағы – сол жолдағы еңбек пен махаббаттың айғағы.
– Сұхбатыңызға рахмет.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!