Рухани келісім күніне орай, ағымдағы жылдың 20 қазан күні облыстық дін істері басқармасына қарасты дін мәселелерін зерттеу орталығының ұйымдастыруымен Жыраулар үйінде облыстық ғылыми-тәжірибелік конфереция өтті. Оған діни бірлестік өкілдері, дін саласының сарапшылары, теолог мамандар, ғалымдар, өзге өңірлерден келген қонақтар мен мемлекеттік органдардың қызметкерлері қатысты.
Іс-шараның негізгі мақсаты – өңірдегі конфессияаралық келісімді нығайту, зайырлы қоғам мен дәстүрлі рухани құндылықтардың сабақтастығын сақтау, сондай-ақ діни ахуалға қатысты өзекті мәселелерді талқылау.
Конференцияны облыс әкімінің атынан құттықтау сөзбен ашқан модератор, облыстық дін істері басқармасының басшысы Мира Қазбекова рухани келісім мен бейбітшілікті сақтау барша қоғамның ортақ міндеті екенін атап өтті.
Конференцияда қоғамдағы рухани процестердің түрлі қырлары талқыланды. Атап айтқанда, Қ.А.Ясауи атындағы ХҚТУ доценті Сержан Оразбай «Рухани келісім – тұрақтылық тұғыры» тақырыбындағы баяндамасында дінаралық татулықтың ұлттық тұрақтылыққа әсерін ашып көрсетті. Ал Жамбыл облысы дін істері басқармасының өкілі Ерзат Жақыпов «Қазіргі жаһандану заманында рухани қауіпсіздік және қазақ халқының рухани болмысы» баяндамасында рухани қауіпсіздік мәселесін ұлттық болмыспен байланыстыра отырып саралады.
Сондай-ақ Қорқыт ата атындағы Қызылорда университетінің профессоры Айтжан Оразбақов Сыр өңіріндегі этникалық әртүрлілік пен тарихи қалыптасу жолдарын баяндаса, дінтанушы Әлібек Жаппасбаев өз сөзінде әлеуметтік желілердегі рухани келісім идеяларын тарату тетіктеріне тоқталды.
Жиын барысында Қазақстан мұсылмандары діни басқармасының өкілдігі, православ шіркеуі мен пресвитериан қауымдастығының басшылары өз ойларымен бөлісіп, конфессияаралық өзара құрмет пен түсіністіктің маңыздылығына тоқталды.
Шара соңында дін саласындағы еңбегі үшін бірқатар азаматтар облыс әкімінің және Қазақстан Республикасы Мәдениет және ақпарат министрлігі Дін істері комитетінің алғысымен марапатталып, «Жыраулар үйінің» жыршы-жырауларының жырларын тыңдап, рухани азық алып қайтты.
Фариза Жорабекова,
«YI GROUP» ЖШС басшысы
Жылдам ақпарат алу үшін Facebook, Instagram желілері мен Telegram каналымызға жазылыңыз!