Күллі алаш жұртына алғашқы астана атануымен даңқы щыққан тарихы терең Сыр елі үшін ғасырдан жеткен жәдігерлердің орны ерекше. Облыстық тарихи-өлкетану музейінің құнды жәдігерлерді, ұлттың ежелгі өркениетін танытудағы орны ерекше. Музейдің жаңа ғимаратқа көшіп, ел игілігіне табысталуы Сыр жұртшылығы үшін үлкен мәртебе, ерекше құрмет, тарихи сәт, айтулы күн. Қасиетті Сыр өңірі – астаналар мекені, ұлт руханияты мен мәдениетінің алтын діңгегі.
Заманауи жаңа ғимарат ұлтымыздың тарихи «Қазақ» атауының қайтарылғанына, Қызылорданың ел астанасы болғанына 100 жылдық мерейтойына керемет тарту болды. Президент Қасым-Жомарт Тоқаевтың бірлік пен берекенің, өнер мен мәдениеттің құтты ұясы болған Сыр өңірін алтын бесікке теңеп, айрықша бағасын беруі қызылордалықтарды қанаттандыратыны белгілі.
Айта кетейік, музейдің ерекшелігі – заманауи үлгідегі жәдігерлерді ерекше үлгіде ұсынатын сандық-мультимедиялық технологиямен жабдықталуы. Жаңа ғимаратта 250 мыңнан астам экспонатты сақтауға мүмкіндік бар. Ол дегеніңіз қазіргі музей қорынан үш жарым есе көп экспонатқа шақталған. Мұнда орта ғасырлар өркениеті, ғарышты игеру залы, балалар музей бөлмесі де бар. Экспозициялар 11 залда орналасқан. Онда аймақ пен ел тарихының даму кезеңінен бастап палентология, археология залы, қазақ хандығы дәуірі, этнография, өңір тарихы Алашорда мұрасы мен соғыс жылдары, мәдениет пен өнер, әлеуметтік-экономикалық даму, ғарыш тақырыбы және ел тәуелсіздігінің қалыптасу жылдары түгел қамтылған. Экспозицияны жан-жақты сезіну үшін жасанды интелект жүйесі, интерактивті LED экрандар жұмыс істейді.
Облыстық тарихи-өлкетану музейі мамандарының айтуынша, жұртшылықты қызықтырғаны – палеонтология залы. Тағы бір ерекшелік, орта ғасыр өркениеті, ұлы Жібек жолының бойында Сыр өңірінің орналасуына орай «ортағасырлық өркениет» залы ашылғаны.
Шынында, сан ғасырдың құпиясын сақтаған жәдігерлердің мекені өңір тарихынан сыр шертетін тағылымды орынның бірі.
Жылдам ақпарат алу үшін Facebook, Instagram желілері мен Telegram каналымызға жазылыңыз!