Үстінен өткен сайын Тұңғыш Президент саябағына мойын созатын болдық. Баннердегі көрінісіне қарап, көз тояды. Шіркін, аумағы 65 гектарға жақын көлемді алып жатқан осы саябақтың жанға сая болатын, абаттанып, заманауи үлгіде жасақталатын күні қашан болар екен деген сауалдың да ойда жүргеніне көп болды. Құрылыс жұмыстары қарқын алған саябақта қандай өзгеріс болатынын мамандардан сұрап білгенді жөн көрдік.
Қызылордаға кіреберісте сонадайдан жарқырап, менмұндалап тұрған саябақты қайта жаңғырту қолға алынғалы бері төбеге мойын созып, әлденені іліп алып, орналастырып, ақ шаңы аспанға көтеріліп жатқанын көрген сайын былайғы жұрт бәрекелді десіп-ақ жүр. «BIGLOBAL» құрылыс компаниясы қолға алған бастама бүгінде бірінші кезеңді артқа тастады. Саябақтың кіреберісінен бастап түрлі үлгідегі субұрқақтар салынбақ.
– Заманауи үлгіге лайық етіп жасалып жатқан саябақтың кіреберісінде орналасқан субұрқақ келушілерді ғаламат күйге бөлеп тұрады. Мұнан соң орта тұсында тағы екі субұрқақ, оның ішінде түрлі көріністе бірнеше түспен көкке атқылайтыны болады. Бұл субұрқақтың суы шығын емес, жиналып, қайтадан негізгі арыққа барады да, насос арқылы қайтадан субұрқаққа айналады. Өзінің суын өзі пайдаланады, – дейді нысан басшысы Еламан Қазикеш.
Ең бір кереметі саябақтың қақ ортасында ағаштың мүсіні қойылған субұрқақ тұрады. Ол айналаға сән беру және мұндағы дизайнның соны үлгісін сақтау үшін қойылған. Ал ең кереметі мұнда тынығу мақсатында келген тұрғындар салауатты өмір салтын ұстанып, спортпен шұғылдана алады.
– Халықтың салауатты өмір салтын ұстануына, жаттығу жасауына бар жағдай жасалған. Мұнда бұл мақсатта төрт спорттық алаңқай болады. Ал одан бөлек, осында аймақтағы ең үлкен аттракцион қойылады. Оның биіктігі – 50 метр және дөңгелек тәрізді аттракцион, – дейді Еламан Қазикеш.
Бұл саябақ 2007 жылы пайдалануға берілді. Содан бері бірде-бір рет қайта жаңғыртудан өтпеген. Жаңа жобада кем-кетігі толық қамтылып, Тұңғыш Президент паркі мен Денсаулық саябағы арасын жалғап, заманауи орынға айналдыру көзделген. Мұнда халықтың сұранысына сай автокөлік тұрағы бар. Үш бірдей аллея, амфитеатр, бетон-скейтпарк, жеті балалар ойын алаңы, 4 workout аймағы, 4 фудкорт, сондай-ақ көптеген шағын сәулеттік пішіндер және аттракциондар болады.
– Әрине, салынған әрбір нысанның ең алдымен сапалы болуын қадағалаймыз. Қазір мұнда төселетін брусчаткалардың өзін Астанадан алдырып жатырмыз. Бірнеше өңірдің өнімін зерттеп, сынап көрдік. Астанадағы компания ғана талапқа сай өнімін ұсына алды. Ол ұстаған қолға да теп-тегіс сезіледі, – дейді нысан басшысы.
Айтпақшы, саябақ арқылы өтетін барлық аллеялар мен тротуарлардың бір-бірімен байланысуы назарға алынған. Яғни, бұл – адамдардың адаспай, жүру бағытын жылдам түсінуге жасалған жағдай. Сондай-ақ вело-жүгіру жолы бүкіл саябақ арқылы шағын және үлкен шеңбер бойымен өтеді. Бұған қатысты жобада модульдік-санитарлық ғимаратын орналастыруға арналған алаңдар қарастырылған.
Қазір саябақ ішіндегі 500 текше метрлік резервуар дайындалып жатыр. Ішкі жолдағы тротуардың негізі қалануда. Мамандар осы жылдың аяғына дейін саябақты жаңғырту жұмысын аяқтайтынын айтуда.
Жобадағы жаңашылдық ойды алысқа жетелейді. Саябақта жасанды тоған, тоған үстіндегі көпір, стилистикалық ағаш орындықтар және демалуға арналған орындықтар бар. Мұнан өзге биіктікке өрмелеу нысаны, ойын құрылғылары, фитнеске арналған спорт қондырғылары, теннис корты, биіктігі 50 метрлік айналмалы дөңгелек аттракционы, балаларға арналған түрлі әткеншектер, тамақтану орындары, би алаңы, паркур, стритбол, сахна, сарқырама каналдары, канал үстінен көпірлер, бадминтон, шахмат, волейбол, баскетбол, футбол алаңдары, арқан саябағы, дария жағалауындағы жүргіншілер жолы, модульдік санитарлық ғимарат қарастырылған. Паркке ауызсу, кәріз су желілері тартылып, көркейту-көгалдандыру жұмыстары қоса жүргізіледі.
Аян СПАНДИЯР
Суретке түсірген Нұрболат НҰРЖАУБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!