Қоңыр күзде аллеяларда жайбарақат серуен құрған үлкен-кіші, ағаштан төгіле түскен жапырақтар қарашаның көз тояр әдемі көрінісі. Бүгінде тұрғындар үшін қала жайлы ортаға айналды. Демалатын, серуендейтін орындар қатары көбейді. Бұрынғыдай «қайда барамыз, ең болмаса серуендейтін жер жоқ» деген шағым естілмейді.
Биыл шаһардағы барлық саябақ пен сквер-аллеялар жаңғырып, жаңарғаны белгілі. Елдің ендігі назары – құрылысы қыза түскен Тұңғыш Президент саябағы. Себебі де белгілі. Қала келбетіне көрік беріп ғана қоймай, қалалықтардың сүйікті демалыс орнына айналатын нысан ел игілігіне берілсе, тұрғындар қуанышы еселене түсетіні анық. Әзірге жаңалықтардан қалт жібермей оқып, нысанның жаңарған сәтін көруге асыққан қалалықтарға саябақ жайынан ақпарат беруді жөн санадық.
Мұнда жобада көрсетілгендей 3 аллея, 6 субұрқақ, 5 амфитеатр, 7 балалар ойын алаңы, 4 спорт және 4 workout, 7 демалыс аймағы, 4 фудкорт, теннис үстелдері, биіктігі 50 метр болатын ойын-сауық аттракционы салынуда. Одан бөлек, бұл аумақта би алаңы, стритбол, вело және жүгіру жолақтары, сахна, сарқырама каналдары мен олардың үстінен өтетін көпірлер, шахмат, баскетбол және футбол алаңдары, арқан саябағы мен модульдік санитарлық нысандар түсуде.
Сонымен қатар саябақ ішінде жыл бойы жұмыс істейтін 300 орындық заманауи балалар тынығу лагерінің және Ботаникалық білім беру орталығының құрылысы жүруде. Осы аумақта спорт блогы, іс-шараларға арналған event-аймақ, тұрғын корпустар, қонақ үй үлгісіндегі шағын ғимараттар, дәстүрлі киіз үйлер, ашық бассейн, стадион, футбол алаңы және сахна салу қарастырылған. Жобаны «Alem Qurylys AQ» ЖШС атқаруда.
Аймақ басшысының тапсырмасына сәйкес, облыс әкімінің орынбасары Бақыт Жаханов пен қала әкімі Нұржан Ахатов жұмыс нысанын аралап көрді. Мердігер мекеменің басшыларымен кездесіп, құрылыс қарқынын арттыруды және нысандарды сапалы әрі мерзімінде аяқтауды тапсырды. Айта кету керек, бұл жобалармен қатар Сырдария өзені үстінен Президент саябағы мен Астана шағын ауданын байланыстыратын жаяу жүргіншілер көпірі салынады.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!