Облыс орталығында ел Президенті атынан «Ғажайыпқа толы Жаңа жыл» атты балаларға арналған дәстүрлі шырша мерекесі өтті. Ертеңгілікке облыс орталығынан және аудандардан үздік, өнерлі, қабілетті, білім бәсекелерінде жетістікке жеткен
200-ге жуық оқушы қатысты. Бүлдіршіндерге Мемлекет басшысы Қасым-Жомарт Кемелұлының құттықтауы мен естелік сыйлықтары табысталды. Балаларды Жаңа жыл мерекесімен облыс әкімі Нұрлыбек Нәлібаев құттықтады.
– Мемлекет басшымыз Қасым-Жомарт Кемелұлының өздеріңізге арнаған жаңажылдық құттықтауы, сыйлықтары мен ұмытылмас әсерлі сәттер сіздерге қуаныш пен шаттық сыйлады деп сенемін. Сіздер – тыныштық пен тұрақтылық орнаған Тәуелсіз Қазақстанымыздың жарқын болашағысыздар. Ата-ананың ең үлкен мақсаты – баласын жақсы, адал азамат етіп өсіру. Ал мемлекетіміз бен қоғамның басты мақсаты – елге ие болатын білімді де отаншыл ұрпақ тәрбиелеу. Сіздердің лайықты өмір сүріп, жақсы білім алуларыңыз үшін жағдай жасау – біздің басты мақсатымыз. Президентіміздің бастамасымен «Адал азамат» біртұтас тәрбие бағдарламасының қабылдануы, «Келешек мектептері» ұлттық жобасының жүзеге асырылуы, «Білімді қолдау», «Қазақстан халқына» қорларының құрылуы – сіздердің игіліктеріңіз үшін жасалған нақты істердің айқын көрінісі. Өңірімізде жас ұрпаққа сапалы білім беру, спортқа, өнерге баулу үшін барлық жағдай жасалуда. Бірер күннен соң халқымыздың жеті қазынасының бірі саналатын Жылқы жылын жақсылықпен, жақсы үмітпен қарсы аламыз. Осындай жарқын сәтте сіздердің жүздеріңіздегі қуанышты көру еліміздің ертеңіне деген сенімімізді нығайтады. 2026 жылды көтеріңкі көңіл күймен қарсы алып, ата-аналарыңызды жақсы жаңалықтармен қуантыңыздар. Жаңа жылда армандарыңыз орындалып, Тәуелсіз елімізбен бірге өсіп-өркендей беріңіздер! – деді Н. Нәлібаев.
Мерекелік шыршада Желаяқ, Күншуақ, Тәттібек, Люми сияқты кейіпкерлер қойылымдар ұсынды. Ертегілер еліне саяхат жасаған оқушылар Жаңа жыл мерекесін керемет тойлады.
Президент шыршасы – игі дәстүр. Бұл мереке балаларға қуаныш, ұмытылмастай әсер сыйлады.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!