Қызылорда қаласындағы «Евразия» спорт кешенінде Тәуелсіздік күніне орай мемлекет және қоғам қайраткері, көрнекті публицист Ілияс Қабыловты еске алуға арналған 2009-2010 жылы туған жасөспірімдер арасындағы X халықаралық дзюдо турнирінің ашылу салтанатты өтті.
Жарыстың ашылу рәсіміне облыстық мәслихат депутаты, облыстық дзюдо федерациясының президенті, «Ауыл» партиясының облыстық филиалының төрағасы Садық Мұстафа, облыстық дене шынықтыру, спорт және туризм басқармасының бөлім басшысы Сағидат Бертай, ҚР Оқу-ағарту министрлігінің Ұлттық ғылыми-практикалық дене шынықтыру орталығының жетекші сарапшысы Нұрсұлтан Бекмұратұлы, «Мейірім құшағы» әйел-бала отбасы жөніндегі облыстық қоғамдық бірлестігінің төрағасы Динара Ибадуллаева, сондай-ақ Қырғызстанның Ош қаласынан арнайы келген дзюдо федерациясының президенті Тимур Сатиев қатысты.
Турнирдың ашылу рәсімінде құрметті қонақтар жас дзюдошыларға ізгі тілектерін білдіріп, жарыста сәттілік тіледі. Одан кейін қазақтың салт-дәстүріне сай қонақ кәде ретінде Қырғызстаннан келген Тимур Сатиевке арнайы сый-сияпат жасалды. Өз кезегінде мәртебелі мейман қырғыз халқының атынан ризашылығын білдіріп, ұйымдастырушыларға естелік сый жасады.
Салтанатты жиын соңында спортшылар мен қонақтар көк туды желбіретіп, патриоттық ән шырқады. Бұл сәт жас спортшыларға жігер беріп, турнирдің рухын одан әрі асқақтата түсті. Айта кетейік, халықаралық доданың биылғы маусымына Қырғызстаннан және Қазақстанның әр аймағынан келген 10 команда, жалпы саны 400-ге жуық жас спортшы қатысуда. Олар алдағы үш күн ішінде 16 салмақ дәрежесінде өзара бақ сынайды.
Жылдам ақпарат алу үшін Facebook, Instagram желілері мен Telegram каналымызға жазылыңыз!