Кеше қала әкімінің орынбасары Дархан Тұрсынбаев қала әкімдігі жанындағы кәмелетке толмағандардың ісі және олардың құқықтарын қорғау жөніндегі комиссияның кезекті отырысын өткізді. Шарада қоғамдағы өзекті 3 мәселені қозғады.
Алдымен кәмелетке толмаған оқушылар арасында орын алған қылмыстар туралы, балалардың білімі мен тәрбиесіне мән бермеген ата-аналардың мәселелерін талқылады. Себебі қоғамда кәмелетке толмаған жастар мен жасөпірімдер арасында түрлі қылмыстар орын алса, енді бірі ата-ананың қарауынсыз түнгі ойын-сауық орындарында жүр. Осыған орай, кәмелетке толмаған жастар мен жасөспірімдер арасындағы құқық бұзушылықтың алдын алу мақсатында қала әкімдігі жанынан мобильді топ құрылып, арнайы рейд жүргізді. Яғни ойын-сауық орындарын, саябақтар мен ойын алаңдары және жастар көп шоғырланатын аймақтарды тексерді. Нәтижесінде 22 әкімшілік құқық бұзушылық дерегін анықтады.
Бұған дейін қала әкімдігі жанынан құрылған мобильді топ ата-аналар және кәмелетке толмаған жастар мен жасөспірімдер арасында түсіндірме жұмыстары жүргізілсе де, түнгі сағат 22:00-ден бастап таңғы 06:00-ге дейін ата-ананың қарауынсыз ойын-сауық орындарында жүрген жастар мен жасөспірімдердің қатары сейілмей тұр. Осыған сәйкес, комиссия отырысында қала әкімінің орынбасары Дархан Тұрсынбаев кәмелетке толмағандардың құқық бұзушылықтарын алдын алу жұмыстарын күшейту мақсатында сала басшыларына тапсырмалар берді
Айта кетейік, кәмелетке толмағандар түнгі сағат 22:00-ден таңғы 06:00-ге дейін ата-ананың қарауынсыз ойын-сауық орындарында жүруге тыйым салынған. Тіпті ересек туысы немесе кәмелетке толған досымен жүруде заңсыз болып саналады. Сондай-ақ кәмелетке толмағандардың заңды өкілі қасында болмаса түнгі 23:00-ден таңғы 06:00-ге дейін көшеде жүруіне де болмайды.
Н.Мұқатаева
Жылдам ақпарат алу үшін Facebook, Instagram желілері мен Telegram каналымызға жазылыңыз!