Сыр өңіріне жұмыс сапарымен келген ҚР Денсаулық сақтау министрі Ақмарал Әлназарова және ҚР Парламенті Мәжілісінің депутаты Мұрат Ергешбаев облыс әкімі Нұрлыбек Нәлібаевпен бірге өңірдегі бірқатар денсаулық нысанды аралады.
Ең алдымен сол жағалаудағы «Қан орталығына» барды.
Айта кетейік, орталықтың іргетасы өткен жылдың тамыз айында қаланған еді. Мұнда жылына 5000-10000 адамға қызмет көрсетіледі. Денсаулық сақтау саласындағы өзіндік орны бар орталық жақын күндері пайдалануға берілмек. Сондықтан жоспарланған жұмыс уақытылы, әрі сапалы атқарылуы тиіс.
Мұнан соң көпбейінді аурухана құрылысымен танысты. Аурухана 2025 жылдың соңында ел игілігіне табысталмақ.
Биыл аймақ медицинасына 140 млрд теңге бағытталғаны салада жаңа, ауқымды жобаларды жүзеге асыруға мол мүмкіндік беруде. Соның дәлелі – Мемлекет басшысының тапсырмасымен басталған «Ауылдық денсаулық сақтауды жаңғырту» ұлттық жобасы біздің өңірде қарқын алды. Ұлттық жоба аясында 11 млрд теңгеге 27 нысан салынуда. Өткен жылы елді мекендерде 15 жаңа дәрігерлік амбулатория, 1 медициналық бекет ашылды. Бүгінде барлығы ел игілігі үшін қызмет етуде. Қалған 11 нысан жыл соңына дейін пайдалануға беріледі.
«Ауыл – ел бесігі» бағдарламасымен қалаға қарасты Досан елді мекенінде жаңа медициналық бекет, Баймұрат батыр ауылында жаңа дәрігерлік амбулатория ашылды.
Көпбейінді облыстық аурухана базасында жаңа МРТ аппараты іске қосылып, 70 орындық перинаталдық бөлім ашылды. Облыс орталығында бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы жүруде.
Сонымен қатар Жаңақорған ауданы «Төменарық» ауылында дәрігерлік амбулаториясымен қоса 15 төсектік ауылдық аурухана салынуда. 8 медициналық нысанға күрделі жөндеу жүргізіліп, 5 нысанның жылу жүйесі газға ауыстырылмақ.
Жақын күндері Жаңақорған ауданындағы көпбейінді аудандық орталық аурухана базасында, жыл соңына дейін Арал ауданында «Қамқорлық» оңалту орталықтары ашылады. Аймақтың медицина саласын дамытуға бюджеттен тыс ресурстарды тарту қолға алынған. «Қазақстан халқына» қорымен тұрақты әріптестік байланыс орнатылып, соңғы екі жылда бөлінген 2 млрд теңгеден астам қаржыға облыстық балалар ауруханасы базасында «Қамқорлық» реабилитациялық орталығы ашылды.
Қор облыстық онкология орталығына еліміздегі 3 өңірде ғана бар 1 млрд 100 млн теңгенің жылжымалы медициналық кешенін сыйға тартты.
Мамандардың біліктілігін арттыру да назардан тыс қалған емес. Биыл 10 реаниматолог, 5 кардиолог Түркиядағы жетекші клиниканың бірі – «Мемориалда» білім жетілдірді. Облыстық медициналық жедел жәрдем стансасы 100 пайыз автокөлікпен қамтамасыз етілсе, өткен жылы басқа да медицина мекемелеріне 25 санитарлық автокөлік табысталды. Биыл 200 автокөлік алынбақ.
Жылдам ақпарат алу үшін Facebook, Instagram желілері мен Telegram каналымызға жазылыңыз!