Теңізбен жаны егіз қаламгер

Ә.Тәжібаев атындағы облыстық әмбебап ғылыми кітапханасында «Әлімсақ» журналының ұйымдастыруы­мен дүниежүзілік теңіз күніне орай ұстаз, аралдық ақын Өтебай Серәлінің «Теңіз әңгімелері», «Жырлайды теңіз жырлайды» атты  кітаптарының тұсаукесер рәсімі өтті.

Шараға ақын-жазушылар, зиялы қауым,жастар, студент­тер және кітапхана оқырман­дары қатысты. Тағылымды шараны «Ұстаз мәртебесі» және «Әлімсақ» журналының ре­дакторы Нұрлан Көбегенұлы жүргізді.

Кеште сөз алған ардагер, инженер-гиротехник Әлібек Сабырбаев, халықаралық Жазу­шылар, Қазақстан Жазушылар одағының мүшесі Еркін Әбілов, өзгеде кеш қонақтары бүгінгі оқырман олжасына айналған туындылар жайлы жылы лебі­зімен бөлісіп, қаламгердің шығармашылығына сәттілік тіледі.

Айта кетейік, ардагер-ұстаз Өтебай Серәлі  ұстаз ғана емес, шығармашылық өкілі. Аралдың асау толқынындай өршіл жырларымен елді тәнті еткен қаламгердің бұған дейін 2018 жылы «Қараүлек» атты әңгімелер жинағы жарық көр­ген. Өз оқырманымен қауыш­қан автордың бүгінгі «Теңіз әңгімелері» атты проза­лық жинағына 12 әңгімесі мен бір хикаяты еніп отыр. Ал «Жырлайды теңіз, жыр­лайды» атты өлеңдер жина­ғы үш бөлімнен тұрады. Жастық шақ, теңіз туралы өлеңдері топтас­тырылған жыр жинағына балалық, жас­тық кезеңнен бастап өзі өмір сүрген ортасы, өмірден түй­ген әсері ерекше иіріммен бейнеленіп, оқырманға жылы әсер сыйлайды. Қаламгердің жинақтарында теңізбен байла­нысты адамдар тағдыры терең баяндалады.

Мен Аралмын,

Тәңірінің сыйы болып жаралдым,

Алтын күннің шуағынан нәр алдым.

Жер-әженің топырағында сайран сап,

Нұрлы дүние шұғыласына орандым.

Мен Аралмын,

Әбдіжәмілмін, жүзге келген абызбын,

«Қан мен термін» және «Соңғы парызбын».

Еламан боп, Жәдігер боп айтылдым,

Адам ата ұрпақтары қарызсың, –

деп жырлаған жалынды ақын жырында туған жерге деген асқақ сезім, терең махаббат, перзенттік тебіреніс жатыр. Өлең­де қарт Аралдың қазіргі қасіретті бейнесі де ерекше тол­ғаныспен  жырланған. Тұ­сау­кесерде теңіз туралы ән шырқалып, бейнефильм көр­се­тіліп тағылымды кештің шырайын ашты. Теңізбен жаны егіз қаламгердің прозалық шы­ғар­масы сахналанып, поэзия­лық туындылары оқыл­ды. Шара соңында «Теңіз – тіршіліктің бесігі» атты кітап көрмесі таныстырылды.

Гауһар ҚОЖАХМЕТОВА

Жылдам ақпарат алу үшін Facebook, Instagram желілері мен Telegram каналымызға жазылыңыз!